Loftið í gufuhvolfinu er um 1,3 kg á hvern rúmmetra.

Allur hnötturinn er umlukinn margra kílómetra þykku lagi af lofti og á hverjum fersentimetra á yfirborði jarðar hvílir um 1 kg af lofti. Þetta er almennt nefnt loftþrýstingur.

Þessi loftþrýstingur þýðir að strangt til tekið hvíla meira en 600 kg af lofti á venjulegu A4-pappírsblaði sem liggur á skrifborðinu. Við getum engu að síður lyft blaðinu áreynslulaust en það stafar af því að loftþrýstingurinn er alls staðar jafn í umhverfi okkar og loftið þrýstir því jafn mikið undir blaðið og ofan á það.

Þess vegna þurfum við í rauninni einungis að lyfta þyngd blaðsins sjálfs, örfáum grömmum. Og þar eð í líkamanum er líka undir svipuðum þrýstingi er engin hætta á að við kremjumst undan þessu fargi.

Förum við upp í há fjöll breytist loftþrýstingurinn og þá þurfum við tíma til að aðlagast. Þetta er ástæða þess að við getum fengið hellu fyrir eyrun í flugvél eða á akstri uppi í fjöllum.

Eiginlega ættu skyntaugar í húðinni að finna stöðugan þrýsting frá loftinu en vegna þess að sá þrýstingur er jafn og stöðugur, hafa skyntaugarnar fyrir löngu vanist honum og sleppa því að láta heilann vita.