Það er fremur að verða regla en undantekning að krónprinsinn í Sádi-Arabíu, Mohammad bin Salman, kynni áætlanir um stórfengleg framtíðarmannvirki.

Nýjasta verkefnið slær þó öll met varðandi stórhug, stærð og kostnað.

New Murabba verður – ef áætlunin gengur eftir – stærsti, nútímalegi byggingarkjarni sögunnar og á að standa fullbúinn árið 2030.

Mannvirkið á að teygja sig yfir 19 ferkílómetra svæði norðvestur af höfuðborginni Riyadh að því er fram kemur í fréttatilkynningu frá PIF, opinberum fjárfestingasjóði Sádi-Arabíu.

Teningislaga skýjakljúfur á að verða kóróna mannvirkisins. Sú bygging hefur hlotið heitið Mukaab eða „Teningurinn“.

Þessi meginbygging verður 400 metrar á hvern veg og þar með nægilega stór til að rúma 20 Empire State-turna.

Í miðju teningsins á að rísa spírallaga turn og í þessu framúrstefnumannvirki á að verða ýmislegt sem laðar að ferðamenn en líka hótel, íbúðir, verslanir og fjölmargt fleira.

Jafnframt er ætlunin að bjóða íbúum og ferðamönnum upp á heilmyndir eða „holography“ og aðra sjónræna afþreyingu, að því er fram kemur.

New Muraba-verkefnið á að rúma hundruð þúsunda íbúa en það er þó einungis ein af margvíslegum stórframkvæmdum sem fyrirhugaðar eru í Sádi-Arabíu. Að samanlögðu er þeim ætlað að styrkja efnahag landsins og gera þetta eyðimerkurríki minna háð olíuvinnslu.