Ef þú skerð þig á beittum hníf, fellur harkalega eða færð bólgu í sár, veldur það líkamlegum sársauka.

Hann virkjar skyntaugar sem senda heilanum boð um sársaukann.

Þótt bæði karlar og konur hafi skyntaugar hefur lengi verið talið að kynin skynji sársaukann ekki á sama hátt. Fyrri rannsóknir hafa sýnt að karlar hafi hærri sársaukaþröskuld en konur.

Og nú hafa sérfræðingar hjá heilsuvísindasviði Arizonaháskóla í Bandaríkjunum fundið ástæðuna.

„Fram til þessa hefur verið álitið að sú taugavirkni sem veldur sársaukaskyni sé í grunninn eins hjá báðum kynjum,“ segir Frank Porreca sem er doktor og rannsóknastjóri hjá Verkja- og sársaukamiðstöðinni við Arizonaháskóla í fréttatilkynningu.

Þetta kynni nú að reynast rangt. Allavega sýnir þessi nýja rannsókn að það er kynbundinn munur á skyntaugaviðtökunum.

Grunngildin mismunandi

Við rannsókn sína notuðu vísindamennirnir hormónið prólaktín sem stýrir myndun brjóstavefs og boðefnið orexín sem er notað sem uppfrískandi lyf.

Áhrif þessara efna á skyntaugar voru skoðuð í sýnum úr nagdýrum, prímötum og mönnum.

„Við komumst að því að ákveðin grunngildi sem leiða af sér sársaukatilfinningu, eru mismunandi í karl- og kvenmúsum og sömuleiðis í karl- og kvenkyns prímötum og svo í körlum og konum,“ segir Frank Porreca.

Ryður brautina fyrir nýja meðhöndlun

Þessi tvö efni, prólaktín og orexín, auka næmi skyntauganna gagnvart sársauka. Vísindamennirnir sáu að prólaktín hafði áhrif á skyntaugar kvenkynsins en ekki karlkynsins. Orexín reyndist virka á taugar í karlkyninu en ekki kvenkyninu.