Stjörnuþyrpingin Messier 5 varð til þegar alheimurinn var enn á unga aldri. Um 500.000 stjörnur hennar fæddust allar í risavaxnu gasskýi fyrir meira en 12 milljörðum ára og hafa síðan haldist saman í þéttri kúluþyrpingu.
Þannig hefur sagan um Messier 5 yfirleitt verið sögð. En uppgötvun í kjarna þyrpingarinnar hefur nú fengið vísindamenn til að endurskoða hana.
Í þéttum miðjuhluta Messier 5 hafa stjörnufræðingar fundið stjörnur sem eru mun yngri en hinar ævafornu stjörnur í ytri hlutum þyrpingarinnar. Ólíklegt þykir að þessar ungu stjörnur hafi orðið til úr leifum hins upprunalega gasskýs eða borist þangað annars staðar frá.
Vísindamenn telja því nú að þær hafi myndast þegar gamlar stjörnur rákust saman. Saga Messier 5 reynist því hafa verið mun viðburðaríkari en áður var talið.
LEIÐARVÍSIR AÐ FYRIRBÆRINU
Svona sérðu fyrirbærið
Hvar og hvenær?
Best er að sjá Messier 5 um miðjan maí þegar tunglsljósið truflar sem minnst. Vegna birtunnar í maí er best er að sjá stjörnuþyrpinguna eftir miðnætti en þá er stjörnuþyrpingin 30–40 gráður yfir sjóndeildarhringnum í suðri -suðaustri — um tíu gráðum vinstra megin við efsta fót stjörnumerkisins Meyjan.
Hvernig?
Með venjulegum sjónauka sést Messier 5 sem dauf ljóskúla. Viljirðu greina einstakar stjörnur í þyrpingunni þarftu hins vegar stjörnukíki.
Einnig er hægt að ljósmynda Messier 5 með venjulegri ljóssterkri myndavélarlinsu og 20–30 sekúndna lýsingu. Ef festingin á stjörnukíkinum er með mótor er líka hægt að taka myndir í gegnum hann.
