Mörgum tekst að losna við kíló með því að breyta mataræðinu og hreyfa sig meira. En margir komast svo að því að kílóin, sem var svo erfitt að losna við, eiga það til að koma aftur.
Þótt erfitt geti verið að viðhalda þyngdartapi til lengri tíma er það alls ekki ómögulegt. Nú telja ítalskir og líbanskir vísindamenn sig hafa fundið þann daglega skrefafjölda sem virðist hjálpa fólki að halda þyngdinni stöðugri.
Í stórri vísindagreiningu sem birtist í vísindatímaritinu International Journal of Environmental Research and Public Health greina þeir frá niðurstöðunum.
Vísindamennirnir greindu gögn frá 3758 einstaklingum með offitu eða alvarlega offitu frá meðal annars Bretlandi, Bandaríkjunum, Ástralíu og Japan. Meðalaldur þátttakenda var 53 ár og meðal-BMI gildið 31.
8500 skref töfratalan
Þátttakendunum var skipt í tvo hópa. Í öðrum hópnum voru 1987 einstaklingar sem fylgdu sérstöku lífsstílsprógrammi með ráðgjöf um mataræði ásamt hvatningu til aukinnar göngu og skráningar á daglegum skrefafjölda.
Í hinum hópnum voru 1771 þátttakendur sem annaðhvort fóru eingöngu í megrun eða fengu enga meðferð. Sá hópur var notaður til samanburðar.
Daglegur skrefafjöldi í báðum hópum var mældur í upphafi rannsóknarinnar, eftir þyngdartapstímabilið og síðan aftur eftir viðhaldstímabil þar sem markmiðið var að halda þyngdinni stöðugri til lengri tíma.
Í upphafi gengu þátttakendur að meðaltali um 7200 skref á dag. Á meðan á þyngdartapinu stóð jók lífsstílshópurinn hreyfingu sína upp í að meðaltali 8454 skref á dag. Á sama tíma léttust þátttakendurnir að meðaltali um 4,4 prósent af líkamsþyngd sinni, sem samsvaraði um fjórum kílóum.
Það gerir okkur gott, en líkaminn er á öðru máli. Megrunarkúrar valda því að heilinn ræðst til atlögu við skynfærin og dómgreindina og við gefumst upp, hvað eftir annað. Vísindin bjóða hins vegar upp á auðvelda leið til að léttast, jafnframt því að innbyrða fitu og kökur:
Það sem vakti þó mesta athygli var það sem gerðist eftir á. Þeir þátttakendur sem héldu áfram að ganga um 8.500 skref á dag náðu að viðhalda megninu af þyngdartapinu. Þegar viðhaldstímabilinu lauk gengu þeir enn að meðaltali 8.241 skref á dag og höfðu lést um þrjú kíló.
„Í slíkum lífsstílsmeðferðum ætti alltaf að hvetja þátttakendur til að ganga um 8.500 skref á dag meðan á megrun stendur og halda því áfram eftir að markmiðinu hefur verið náð til að draga úr líkum á að þyngdin aukist aftur,“ segir prófessor Marwan El Ghoch við háskólann í Modena og Reggio Emilia á Ítalíu í fréttatilkynningu.“
„Þetta er einföld og ódýr leið til að halda þyngdinni stöðugri eftir þyngdartap.“
