,,Borðaðu nú grænmetið þitt”.
Þetta hafa eflaust flestir heyrt við matarborðið og þótt ásetningur foreldra okkar hafi tvímælalaust verið góður breytti það ekki miklu. Sérstaklega ef eitthvað annað á matardisknum leit betur út..
Grænmeti er hollt. Enginn vafi er á því. Og sumt grænmeti virðist hollarara en annað þegar kemur að því að lækka blóðþrýstinginn.
Þetta er að minnsta kosti niðurstaða lítillar rannsóknar, þar sem ástralskir vísindamenn frá Edith Cowan háskólanum í Perth prófuðu mismunandi grænmetissamsetningar á hópi átján miðaldra ástralskra kvenna og karla.
Í ljós kom að þau sem borðuðu 300 grömm af spergilkáli, grænkáli, blómkáli og hvítkáli á hverjum degi í tvær vikur bættu verulega blóðþrýstingin.
Sami ávinningur varð ekki hjá þeim sem neyttu svipaðs magns af kartöflum, sætum kartöflum, gulrótum og graskeri.
Báðar grænmetisblöndurnar voru bornar fram sem súpa sem þáttakendur borðuðu með hádegismat og kvöldmat.
Í tilrauninni, sem birtist í tímaritinu BMC Medicine, fékk helmingur þátttakenda eina grænmetisblönduna í tvær vikur og hinn helmingurinn fékk hina samsetninguna í sama tíma.
Síðan fóru báðir hópar á venjulegt mataræði næstu tvær vikurnar og eftir það skiptu hóparnir um grænmetissamsetningu í tvær vikur til viðbótar.
Helsta orsök hjartasjúkdóma
Allir þátttakendurnir voru þegar með vægan og upp í meðallagi háan blóðþrýsting og forsvarsmaður rannsóknarinnar, Emma Connolly, sem er doktorsnemi við Edith Cowan háskólann, lagði áherslu á í fréttatilkynningu hversu mikilvægt það er að borða meira af grænmeti af krossblómaætt.
„Háþrýstingur er aðalorsök hjartasjúkdóma sem verða stöðugt algengari með aldrinum. Mælt er með því að auka neyslu á grænmeti til að minnka líkur á hjartasjúkdómum,“ útskýrir hún og heldur áfram.
“Fyrri athugunarrannsóknir hafa sýnt fram á að grænmeti af krossblómaætt, eins og spergilkál, hvítkál og rósakál, hefur öflugri áhrif en annað grænmeti. Þó að grænmeti af krossblómaætt sé borðað um allan heim er það aðeins lítill hluti af heildarinntöku grænmetis, “ útskýrir Emma Connolly.
Vísindamennirnir sáu lækkun á blóðþrýstingi um 2,5 mmHg hjá þeim sem borðuðu súpu með spergilkáli, grænkáli, blómkáli og hvítkáli daglega í tvær vikur
Það sama gerðist ekki hjá þeim sem neyttu hinnar grænmetisblöndunnar. Blóðþrýstingsfallið samsvarar um það bil fimm prósentum minni hættu á að verða fyrir áhrifum af blóðtappa í hjarta eða heilablóðfalli.
Inniheldur mikilvæg efni
Áströlsku vísindamennirnir hafa líka skýra hugmynd um hvers vegna einn flokkur grænmetis virðist betri þegar kemur að blóðþrýstingi okkar.
„Það er sérstakur flokkur efna sem kallast glúkósínólöt og finnast nær eingöngu í grænmeti af krossblómaætt. Sýnt hefur verið fram á í rannsóknum á dýrum að þessi efni lækka blóðþrýsting en enn sem komið er eru aðeins takmarkaðar upplýsingar úr rannsóknum á mönnum,“ segir Emma Connolly.
Hjörtu okkar slá 100.000 sinnum á sólarhring. Vísindamenn hafa nú komist að raun um að hver einasti sláttur hefur áhrif á heilann þannig að skynfærin slævast, sársaukaþröskuldurinn hækkar og tilfinningarnar verða næmari.
Einnig hefur verið sýnt fram á að glúkósínólötin hafa hamlandi áhrif á krabbamein og þau eru einnig bólgueyðandi, vinna gegn sykursýki og lækka fituinnihald í blóði.
Í þessari rannsókn kom einnig í ljós að einstaklingar sem borðuðu súpu úr grænmeti af krossblómaætt náðu marktækri lækkun á þríglýseríðum, sem eru fitutegund sem, eins og kólesteról, tengist aukinni hættu á æðakölkun og hjartasjúkdómum. æðasjúkdóma.
Dagleg inntaka af grænmeti af krossblómaætt er auðvitað engin trygging gegn háum blóðþrýstingi. En með breyttu mataræði og lífsstílstengdum breytingum sem sýnt hefur verið fram á að gagnast blóðþrýstingi, getur grænmetið hjálpað til.
