Þeir sem vilja lifa lengi ættu að íhuga að gerast blóðgjafar. Þetta er niðurstaða viðamikillar dansk-sænskrar rannsóknar.

Rösklega ein milljón blóðgjafa tóku þátt í rannsókninni sem leiddi í ljós að hættan á ótímabæru andláti minnkaði í takt við fjölda skipta sem hver blóðgjafi gaf blóð á hverju ári. Í raun réttri minnkaði hættan um 18,6% fyrir hvern blóðskammt sem hver blóðgjafi velur að gefa.

Ástæðan er að öllum líkindum sú að blóðgjafir verndi blóðgjafann gegn hjarta- og æðasjúkdómum.

Vísindin greinir þó á um þetta.

Blóðgjafar yfirleitt heilsuhraustari

Á síðasta ári greindu hollenskir vísindamenn vísindaleg gögn á þessu sviði og komust að raun um að 9 af hverjum 14 rannsóknum greindu frá jákvæðum áhrifum þess að gefa blóð.

Rannsóknirnar tóku hins vegar ekki með í reikninginn „áhrif heilsuhraustra blóðgjafa“. Blóðgjafar eru nefnilega iðulega hraustari en gengur og gerist og þessi staðreynd getur leitt af sér rangtúlkanir.

Sem dæmi má nefna að hættan á ótímabæru andláti innan hópsins breyttist úr 18,6% niður í 7,5% eftir að ákveðið hafði verið að taka með í reikninginn betra heilsufar blóðgjafa en annarra samfélagshópa.

Þó svo að jákvæð áhrif blóðgjafar á hjarta- og æðakerfið séu hugsanlega ekki eins mikil og í fyrstu var talið þá er fólk sem gefur blóð jafnframt heilsusamlegra að öðru leyti.

Rannsóknir hafa nefnilega leitt í ljós að góðverk eru að öllu jöfnu gagnleg, því það að hjálpa fólki í neyð leiðir af sér minni streitu og betra skap.