Elsta skjalfesta tilfellið um verðbólgu átti sér stað í Babýlon til forna á árunum eftir dauða Alexanders mikla árið 323 f.Kr.
Þessu hélt bandaríski hagfræðingurinn og sagnfræðingurinn Peter Temin frá Massachusetts Institute of Technology fram árið 2002 – eftir að hann hafði skoðað fjölda babýlonskra leirtafla með fleygrúnaskrift.
Töflurnar innihalda meðal annars upplýsingar um verð á ýmsum vörum og þær sýna að verð á döðlum, ull og byggi hækkaði hratt eftir dauða Alexanders.
Að sögn Temins stafaði verðbólgan af því að dauði hershöfðingjans leiddi til valdabaráttu meðal arftaka hans í Babýlon sem keyptu málaliða með því gríðarlega magni af silfri sem Alexander hafði lagt undir sig í Persíu.
Alexander mikli lagði Babýlon, þar sem nú er Írak, undir sig árið 331 f.Kr. Þar lést hann átta árum síðar.
Verð á silfri hrapaði
Markaðurinn fylltist því af silfri sem olli því að verð á eðalmálminum lækkaði – og þar með hækkaði einnig verð á ýmsum vörum.
Babýlonska verðbólguskeiðið stóð yfir í um áratug og fyrir meðal Babýlóníumanninn þýddi það að verðmæti silfurpeninga helmingaðist.
„Þetta er fyrsta skjalfesta dæmið um verðbólgu og bendir til þess að markaðshagkerfi hafi verið í Babýlon,“ útskýrir Peter Temin.
