Frá því að eggið fer úr eggjastokk hænunnar þar til hún verpir því líður einn sólarhringur. Á þessum tíma hafa myndast eggjahvíta, himnur og kalkrík skurn.

Leið eggsins gegnum hænuna hefst í eggjastokknum, sem líkist vínberjaklasa með misþroskuðum eggjum. Hér þroskast ein eggfruma (rauðan) og rennur niður eggjaleiðarann þar sem hún fer í gegnum ýmis hólf.

Eggfruman frjóvgast í „infunibulum“, ef hani hefur komið við sögu. Fáeinum mínútum síðar rennur eggfruman áfram í „magnum“ þar sem eggjahvítunni er bætt utan á, en hún kemur úr kirtlum í eggjaleiðaranum. Hvítan er í fjórum lögum og tekur um fjóra tíma að mynda hana, áður en himnurnar tvær myndast í „isthmus“. Eggið berst nú aftur í móðurlífið þar sem himnurnar eru fylltar af vatni og steinefnum sem eiga að næra hið vaxandi fóstur og vernda það gegn höggum og slögum. Þetta tekur um fjóra tíma. Eftir þetta tekur skurnkirtillinn við og er í 14 klukkustundir að leggja skurnina utan á eggið, áður en það berst að lokum út í endaþarminn og hænan verpir því. Skurnin er 97% kalk og það tekur hænan úr beinum sínum. Síðar, þegar unginn er að verða fullburða, soga bein hans til sín nokkuð af kalki úr skurninni, sem þar með þynnist og unginn á auðveldara með að brjóta hana.

Skurnin er flókin bygging með hárfínum loftgötum til að unginn nái að anda, jafnframt því sem hann er verndaður gegn höggum og þrýstingi. Þótt egg fugla séu misjöfn að lögun, eiga þau það sameiginlegt að bogadregið formið veitir því aukinn styrk. Lögun eggsins fer eftir tegund og ræðst af móðurlífi kvenfuglsins. Fuglar sem verpa í opnu rými verpa nokkuð oddmjóum eggjum sem velta síður burtu, en fuglar sem verpa í holum eða trjám verpa kúlulaga eggjum.