Við hugsum oft um það en tölum sjaldan um það. Kynlíf er því efni þar sem misskilningur og goðsagnir hafa lausan tauminn.
Sem dæmi má nefna að líklega hafa flestir heyrt að afrískir karlmenn séu með stærri getnaðarlim en karlar annarra þjóða. En hvaðan kemur sú goðsögn og á hún sér stoð í raunveruleikanum?
Sem betur fer geta vísindin gefið okkur svör við svona spurningum. Við höfum því kafað ofan í rannsóknir til að leiða í ljós þann sannleika sem oft kemur á óvart á bak við nokkrar af útbreiddustu goðsögnum um kynlíf.
Stærð
Mýta 1: „Afríkumenn eru með lengri lim“
Bandarísk rannsókn leiddi í ljós að meðallengd getnaðarlima er sú sama hvaða kynþætti sem karlar tilheyra.
Víðtæk rannsókn sem tók til 15.521 karlmanns frá 16 ólíkum löndum árið 2014 sýndi ekki fram á neinn marktækan stærðarmun í ólíkum löndum. Fyrir vikið er engin vísindaleg sönnun fyrir þeirri algengu bábilju að karlar af afrískum uppruna séu með lengri lim en aðrir karlar.
Mælingar í Nígeríu leiddu í ljós að lengd lima í hvíld þar í landi nam 8,16 sentímetrum. Þegar svo vísindamenn í Tansaníu mældu lengd lima í hvíld sem teygt var á, þ.e. mæling sem samsvarar nokkurn veginn stinnum limum, mældust þeir að meðaltali 11,5 cm á lengd. Báðar þessar tölur eru í námunda við alþjóðlegt meðaltal sem leiddi í ljós annars vegar lengdina 9,16 cm og hins vegar 13,24 cm.
Rannsókn sem gerð var á 1.661 Bandaríkjamanni, af ólíkum kynþáttum, leiddi heldur ekki í ljós neinn marktækan mun á milli hópanna. Hvítir Bandaríkjamenn, Bandaríkjamenn af afrískum uppruna og endanlega af asískum uppruna mældust að meðaltali með reista limi af stærðinni 14,2, 14,7 og 14,1 sentímetri.
Ósatt
Kynfæri
Mýta 2: „Kynfæri karla og kvenna eru gerólík“
Kynfæri drengja og stúlkna eru alveg eins í upphafi fósturþroskans (efst).
Kynfæri karla og kvenna eru gerólík á að líta en í raun réttri eru þau uppbyggð úr nokkurn veginn sömu þáttunum. Líkindin stafa af því að kynfæri drengja og stúlkna eru alveg eins á fyrstu vikum fósturþroskans.
Frá því að byggja á sama uppruna þroskast kynfærin svo hvort í sína áttina, t.d. þroskast eggjastokkar kvenna og eistu karla úr sömu kynkirtlunum.
Ytri kynfæri sex vikna fóstra samanstanda hjá báðum kynjum af litlum hnúði, tveimur fellingum og tveimur þrútnum svæðum. Þessir þættir þróast hjá stúlkum í sníp, svo og innri og ytri skapabarma. Hjá drengjum þróast þeir í getnaðarlim, þvagrás og pung.
Ósatt
G-blettur
Mýta 3: „Konur eru með G-blett“
Þessi röntgenmynd sýnir konu og karl hafa samfarir. G-blettur konunnar er sagður vera á fremri vegg legganganna (rauður hringur).
G-blettur konunnar er sérlegur staður í leggöngunum sem veitt getur konum ákaflega mikla nautn sé hann örvaður. Vísindamenn greinir hins vegar á um hvort bletturinn sé raunverulega til.
Málsvarar G-blettsins segja hann vera að finna á framanverðum leggangaveggnum, fimm til sjö sentímetrum frá leggangaopinu. Þessi staðsetning ákvarðast m.a. af kínverskri rannsókn sem leiddi í ljós að nákvæmlega á þeim stað er einmitt að finna taugabúnt.
Aðrir vísindamenn eru ekki eins vissir í sinni sök. Þeir telja sannanirnar ekki nægja til að draga þá ályktun að leggöngin hafi yfir að ráða sérlegri líffærafræði þar sem G-blett eigi að vera að finna. Tilvist G-blettsins á einnig undir högg að sækja fyrir þá staðreynd að sumar konur skynja enga nautn þegar staðurinn er örvaður.
Hugsanleg skýring á ágreiningi þessum kann að vera sú að G-bletturinn sé í raun framlenging á snípnum. Stærð snípsins er breytileg frá einni konu til annarrar sem kann að skýra hvers vegna einungis sumar konur finna fyrir G-blettinum.
Óútkljáð
Hugsanir
Mýta 4: „Karlmenn hugsa um kynlíf á 7 mínútna fresti“
Karlmenn hugsa oft um kynlíf en bandarísk rannsókn sýnir að það gerist ekki jafn oft og sumir telja.
Karlmenn hugsa raunar oftar um kynlíf en við á um konur en þó ekki jafn oft og sumir staðhæfa. Í bandarískri tilraun frá árinu 2012 áttu 283 háskólapiltar að telja hversu oft þeir leiddu hugann að mat, kynlífi eða svefni á einni viku.
Niðurstöðurnar leiddu í ljós að karlmenn hugsuðu um kynlíf alls 34,2 sinnum á sólarhring sem táknar að þeir hugsuðu um það tæplega tvisvar á hverjum klukkutíma í vöku, á meðan konur íhuguðu samfarir rétt rúmlega einu sinni á klukkustund eða alls 18,6 sinnum á dag. Kynlíf var það umhugsunarefnanna þriggja sem flestum var ofarlega í huga.
Tíðar kynlífshugsanir karla kunna að stafa af því að karlmenn hugsa að öllu jöfnu oftar um grunnþarfir sínar en við á um konur. Rannsóknin leiddi nefnilega einnig í ljós að karlar hugleiða mat og svefn einnig oftar en konur.
Ósatt
Tíðahringurinn
Goðsögn 5: „Öruggir dagar í tíðahring kvenna“
Konan getur aðeins orðið þunguð í stuttan tíma í hverjum mánuði - en það getur verið erfitt að ákvarða hvenær það tímabil byrjar og lýkur.
Óski kona og karl þess að stunda kynlíf án þess að getnaður eigi sér stað er öruggasta lausnin að nota getnaðarvarnir á borð við smokk eða pilluna. Þá er einnig unnt að koma í veg fyrir þungun með því að fylgjast grannt með dagatalinu.
Þungun á sér nefnilega einungis stað ef sáðfrumur mannsins hafa tök á að frjóvga eggfrumur konunnar. Þetta gerist um það bil einu sinni í mánuði frá því að egglos verður og næstu þrjá daga á eftir. Samfarir geta einnig leitt til þungunar þó svo að þær eigi sér stað nokkrum dögum fyrir egglosið því sæðisfrumur geta lifað inni í konunni í fjóra daga.
Þegar á heildina er litið geta konur því orðið óléttar í um það bil sjö daga í hverjum mánuði. Utan þessara daga er því í raun réttri gerlegt að hafa samfarir án þess að eiga á hættu að úr verði barn.
Tíðahringur skiptist í þrennt
Slímhimna legsins og eggfrumur eggjastokkanna gangast undir tíðahring sem að meðaltali stendur yfir í 28 daga. Konur geta einungis orðið þungaðar í miðjum tíðahringnum.
1. Legið losar sig við slímhimnuna
Teikningin sýnir þverskurð legsins og þróun þess dag frá degi. Á fyrstu fimm dögum tíðahringsins, um það bil, losnar slímhimnan og ný myndast. Á þessu tímabili verða konur ekki þungaðar.
2. Eggjastokkur losar egg
Slímhimnan heldur áfram að myndast í leginu og eftir u.þ.b. 14 daga losnar egg úr eggjastokknum sem getur frjóvgast. Samfarir frá og með 10. degi geta þó leitt af sér þungun, því sáðfrumur geta lifað í konum í fjóra daga.
3. Slímhimna brotnar niður
Frá og með 19. degi, um það bil, getur þungun ekki átt sér stað. Ófrjóvguð eggfruman líður undir lok og frumurnar í slímhimnu legsins byrja að deyja áður en legið losar sig aftur við himnuna í upphafi næsta tíðahrings.
Hins vegar getur verið erfitt að vita nákvæmlega hvenær í tíðahringnum þessir öruggu dagar eru. Ástæða þessa er sú að erfiðleikum reynist háð að ákvarða nákvæmlega hvenær egglos verður.
Að öllu jöfnu á það sér stað 14 dögum fyrir upphaf næstu blæðinga en þetta getur verið breytilegt hjá konum. Ef kona fær blæðingar á 24 daga fresti hefst örugga tímabilið hjá henni 13 dögum eftir upphaf síðustu tíða þar til sex dögum eftir upphaf næstu blæðinga. Ef tíðahringurinn hins vegar nemur 32 dögum verður örugga tímabilið að finna frá 21 degi eftir upphaf síðustu blæðinga og þar til 14 dögum eftir upphaf þeirra næstu.
Óvissan gerir það að verkum að það getur verið varasamt að treysta á dagatalið. Jafnvel þegar aðferðinni er beitt á réttan hátt eru 15% líkur á að konur verði samt sem áður þungaðar á næsta 12 mánaða tímabili.
