Nú hefur orðið sannkölluð sprengifjölgun varðandi þekktar örverur í þarmaflóru manna.
Með sérstakri DNA-tækni, svonefndri meta-erfðatækni, hafa vísindamenn rannsakað fjölbreytni lífríkisins í meltingarvegi manna og uppgötvað meira en 140.000 mismunandi veirutegundir.
Meira en helmingur þeirra var áður óþekktur.
Óhugnanleg fjölbreytni í þarmaflórunni
Tegundafjöldi veira er sá mesti sem þekktur er á jörðinni og vísindamenn hafa lengi vitað að meltingarvegur manna er heimili gríðarlegs fjölda örvera.
Engu að síður kemur tegundafjöldinn á óvart og þá einkum fjöldi veirutegunda.
Þessi mikli fjöldi áður óþekktra veira og baktería fannst með DNA-greiningartækni sem nefnd er meta-erfðatækni.
Veirur ráðast á bakteríurnar
Ekki eru allar veirur skaðlegar mönnum.
Margar þær veirur sem nú hafa fundist eru svonefndar gerilætur eða veirur sem ráðast á bakteríur í þörmunum og bana þeim.
Þetta getur þó mögulega valdið ójafnvægi í bakteríuflóru þarmanna og þá skapað okkur vandkvæði.
Niðurstöður rannsóknarinnar mynda nú gagnagrunn yfir erfðaefni einmitt þeirra veirugerða, gerilætanna sem geta ráðist á bakteríur.
Í gagnagrunninum – sem kallast „Gut Phage Database“ eða „Innyfla-gerilætugrunnur“ – eru nú 142.809 erfðamengi veira og gagnagrunnurinn getur auðveldað vísindamönnum að reikna út hvaða hlutverkum veirur og bakteríur gegna, bæði varðandi heilbrigði okkar og gagnvart þeim bakteríum sem lifa í þarmaflóru okkar.