Margar og misjafnar kenningar eru til um ástæður þess að sumt fólk telur sig sjá drauga.
Einna vísindalegust er kenning sem m.a. Michiels Van Elk sálfræðiprófessor við Leidinháskóla í Hollandi hefur sett fram. Hann hefur rannsakað yfirnáttúrulega atburði, sem sé atvik sem virðast utan við öll þekkt náttúrulögmál.
Rannsóknir Van Elks benda til að fólk sem t.d. sér drauga hneigist fremur til þess en aðrir að treysta innsæi sínu og tilfinningum en stjórnist síður af rökréttri viðbragðshugsun.
Slíkt fólk hefur fremur tilhneigingu til að túlka ýmis atvik þannig að þau stýrist af vilja, svo sem ef lykill fellur niður á gólf frammi á gangi meðan þú situr í hægindastól í stofunni.
Spil afhjúpa drauga
Van Elk hefur m.a. gert tilraunir þar sem þátttakendur áttu að giska á hvar í spilastokknum tiltekið spil væri niður komið. Á grundvelli niðurstaðnanna skipti hann þátttakendum í tvo hópa.
Í öðrum hópnum lenti fólk sem skýrði vel heppnað gisk sem einskæra heppni. Slíkt fólk sér sjaldnast drauga.
Í hinn hópinn valdi hann fólkið sem taldi sig hafa haft á tilfinningunni eða jafnvel vitað af hreinu innsæi hvar spilið væri. Þetta fólk telur Van Elk mun líklegra til að trúa því að það hafi séð eitthvað yfirnáttúrulegt.
Það er erfitt að festa hendur á því hversu margt fólk telur sig hafa séð draug.
Samkvæmt bandarískri rannsókn frá árinu 2009 virtust þetta þó vera um 18%.
Þarf öðruvísi heila til að sjá drauga
Heilaskannanir og rannsóknir á hugsanamynstri sýna talsverðan mun á fólki sem oft sér eitthvað yfirnáttúrulegt og hinum sem aldrei gera það.
1.Heilinn sér meðvitaðar aðgerðir
Hollenski sálfræðiprófessorinn Michiel Van Elk hefur sýnt fram á að fólk sem sér yfirnáttúrulega atburði hefur tilhneigingu til að telja það meðvitaðar aðgerðir sem aðrir líta á sem tilviljun.
2. Heilahvelin vinna saman
Bandaríski sálfræðiprófessorinn Christine Simmonds-Moore hefur fundið ummerki þess að fleiri taugaboð berist milli heilahvela fólks sem sér yfirnáttúruleg fyrirbrigði.
3. Meðvitundin vinnur með því ómeðvitaða
Ástralski dularsálfræðingurinn Michael Thalbourne hefur sýnt fram á að sumt fólk sem skynjar yfirnáttúruleg fyrirbrigði gerir ekki skýran mun á meðvituðu og ómeðvituðu minni og telur það tilviljanakennt.
