1. Mannlegi eldingavarinn
Þjóðgarðsvörðurinn sem varð fyrir eldingu sjö sinnum
Roy Sullivan sýnir skemmdan hatt sinn eftir eina af fjölmörgum eldingum sem hann varð fyrir.
Í apríl 1942 varð þjóðgarðsvörðurinn Roy Sullivan fyrir eldingu eftir að hann leitaði skjóls í varðturni í Shenandoah þjóðgarðinum í Virginíufylki.
Sérfræðingar hafa reiknað út að líkurnar á að verða fyrir eldingu í Bandaríkjunum séu 1 á móti 15.300. Enn ótrúlegra var þó að Sullivan slapp aðeins með brunasár á hægri fæti og brotna nögl á stórutá.
En næstu 35 árin varð hann fyrir eldingu sex sinnum til viðbótar og fékk hann viðurnefnið „Mannlegi eldingavarinn“.
Hann upplifði meðal annars að eldingar fóru í gegnum líkama hans, þeyttu skónum hans af fótunum og kveiktu í hári hans.
„Guð bjargaði mér af góðri ástæðu,“ sagði Sullivan eftir að hafa orðið fyrir fimmtu eldingunni.
Margir hafa efast um sögur Sullivans en heimsmetabók Guinness taldi fullyrðingarnar nægilega trúverðugar til að hafa þjóðgarðsvörðinn með í bókinni frægu.
2. Vinningar í lífinu og í lottói
Vaknaði úr dái og vann í lottóinu – tvisvar!
Bill Morgan bjó í litlu hjólhýsi í úthverfi Melbourne þegar lífið brosti skyndilega til hans nokkrum sinnum á örfáum mánuðum.
Árið 1998 féll þá hinn 37 ára gamli Ástrali Bill Morgan niður vegna hjartaáfalls. Hann var klínískt látinn í 14 mínútur áður en læknum tókst að lífga hann við.
Morgan var hins vegar í djúpu dái og eftir 14 daga gerðu læknar ráð fyrir því að slökkva á öndunarvélinni sem hann var tengdur við. En rétt áður en það gerðist komst Morgan til meðvitundar á undraverðan hátt.
Þessi atburður var sá fyrsti í röð ótrúlegra atburða. Nokkrum mánuðum síðar keypti Morgan skafmiða og vann á hann bíl.
Atburðirnir tveir vöktu athygli sjónvarpsstöðvar á staðnum og þeir vildu gera sjónvarpsinnslag um heppni Morgans. Þess vegna báðu þeir hann að endurleika augnablikið þegar hann vann bílinn.
Og til gamans keypti Morgan nýjan lottóskafmiða sem hann skóf fyrir framan myndavélina en á honum reyndist leynast hvorki meira né minna en 250.000 dollarar – u.þ.b. 40 milljónir króna á núvirði. „Nú fæ ég annað hjartaáfall,“ hugsaði Morgan sem lifði þó af og keypti sér síðar hús fyrir peningana.
Sjáið Morgan vinna 250.000 dollara:
3. Heppni í óheppni
Tónlistarkennari komst hjá dauðanum trekk í trekk
Frane Selak gaf stóran hluta lottóvinningins til góðgerðarmála.
Enginn er ódauðlegur en Frane Selak kom nær því en flestir. Króatíski tónlistarkennarinn náði að svindla á dauðanum alls sjö sinnum áður en hann sofnaði svefninum langa 87 ára gamall árið 2016.
Selak slapp í fyrsta skipti frá dauðanum árið 1962 þegar lest þar sem hann var farþegi í fór út af sporinu í ískalt stöðuvatn. 17 samfarþegar hans fórust en Selak handleggsbrotnaði.
Í fyrsta og eina flugi Króatans þeyttist hann út um bilaða flugvélarhurð en var svo heppinn að lenda í stórum heystakki.
Síðar var hann farþegi í rútu sem rann út af veginum og ofan í á. Selak náði að synda í land en fjórir aðrir létust.
Því næst kviknaði í bíl hans nokkrum sinnum með honum innanborðs. Árið 1996 lenti hann í árekstri við flutningabíl á fjallvegi en kastaðist út úr bílnum sem hrapaði niður 300 metra háa fjallshlíð.
En heppni hans var alls ekki lokið og þegar hann var 73 ára gamall vann Selak margar milljónir í lottóvinningi. „Nú finnst mér lífið byrja fyrir alvöru,“ sagði hann.
4. Lifði af kjarnorkusprengjur
Japani lifði af báðar kjarnorkusprengjurnar
Tsutomu Yamaguchi sagði sögu sína í heimildarmynd árið 2006, þá tæplega níræður.
Þann 6. ágúst 1945 var japanski kaupsýslumaðurinn Tsutomu Yamaguchi á leið á lestarstöðina í Hiroshima þegar bandarísk sprengjuflugvél varpaði kjarnorkusprengjunni „Little Boy“ yfir borgina.
Ég „sá gífurlegan ljósglampa og þeyttist svo í burtu,“ sagði Yamaguchi síðar.
Sprengingin sprengdi hljóðhimnur Yamaguchi, blindaði hann tímabundið og fékk hann alvarleg brunasár á líkamann.
Eftir að hafa varið nóttinni í skjóli ferðaðist Yamaguchi samt daginn eftir til Nagasaki, þar sem hann mætti til vinnu eins og áætlað var.
Hann var við það að fara að segja samstarfsfólki sínu frá reynslu sinni í Hiroshima þegar bandarísk flugvél varpaði „Fat Man“ kjarnorkusprengjunni yfir borgina.
Yamaguchi lifði af og er opinberlega sá eini sem vitað er sem hefur lifað af tvær kjarnorkuárásir.
Hirðulaus líffræðingur, þungbúinn dagur og hundur sem gat ekki haldið í sér þvagi. Tilviljanir hafa marg oft gagnast vísindamönnum og lagt grunninn að fjölmörgum merkum uppgötvunum þeirra.
5. Ríkur af heimskulegum áformum
Fávís kaupsýslumaður gat ekki gert neitt rangt
Timothy Dexter skreytti stóra eign sína með máluðum viðarstyttum til að reyna að heilla nágrannana.
Timothy Dexter fæddist í ensku nýlendunni í Massachusetts Bay héraði árið 1747 – og þótti heimskari en flestir. Aftur á móti var hann ótrúlega heppinn. Hann giftist konu sem átti peninga og græddi stórfé í viðskiptum.
Til að reyna að koma höggi á Dexter reyndu keppinautar hans að tæla hann út í vonlaus viðskiptaverkefni.
Til dæmis fengu þeir hann til að selja ullarhanska til hlýrra suðurhafseyja. En heppnin var með Dexter. Hanskarnir voru keyptir af asískum kaupmönnum og síðan endurseldir með hagnaði til Síberíu.
Jafnvel þegar keppinautar hans fengu Dexter til að senda kol til Newcastle, hjarta enska kolaiðnaðarins, gekk það óvænt allt vel. Námumennirnir voru nefnilega nýfarnir í verkfall og Dexter seldi kolin sín með gríðarmiklum hagnaði.
Lestu meira um heppni
Ripley’s Believe It or Not!, Ripley Publishing, 2022
A World of Luck (Library of Curious and Unusual Facts), Time Life Education, 1991
