Vel varðveittur steingervingur sannar nú að hinn ógnvænlegi hvítháfur er kominn af makóháfinum, en sú tegund lifir enn. Þetta segja vísindamenn hjá Náttúruminjasafni Flórída. Líffræðingar hafa hingað til ekki vitað með vissu hvort hvítháfurinn væri afkomandi makóháfsins eða hins útdauða megalódons sem varð um 20 metra langur og stærsti ránfiskur sem nokkru sinni hefur farið um heimshöfin.

M.a. fannst bæði kjálki í heilu lagi með 222 ósködduðum tönnum og hryggsúlan. Til að ganga úr skugga um hvort þessi skepna væri komin af makóháf eða megalódon hafa menn einbeitt sér að því að rannsaka tennurnar. Niðurstaðan er sú að steingervingurinn sé af mjög stórum hvítháf sem náskyldur hafi verið breiðtenntri makóháfstegund, Isurus hastalis, sem uppi var fyrir 9-10 milljónum ára og varð um 8 metra langur. Steingervingurinn fannst í suðurhluta Perú og er 4-5 milljón ára gamall. Hann fannst 1988 en var framan af í eigu einkasafnara í Bandaríkjunum. M.a. af tönnunum að dæma hefur þessi háfur verið um 20 ára þegar hann drapst og um 5 metra langur.