Aldur okkar er í raun bara tala sem segir til um hversu oft við höfum farið í kringum sólina. Á hinn bóginn er líffræðilegur aldur líkamans mælikvarði á hversu mikið líkaminn hefur elst.
Líffræðilegur aldur er reiknaður út með algrími sem meðal annars notar upplýsingar um efnaskipti, blóðþrýsting, líffæri og ónæmiskerfi.
Í rannsókn einni notuðu vísindamenn heilsufarsgögn frá 21.575 Bandaríkjamönnum á aldrinum 20–79 ára á tímabilinu milli 1988 og 2010.
Rannsóknin leiddi í ljós markverðar breytingar á líffræðilegum aldri.
Hjá körlum og konum í öllum aldurshópum hefur líffræðilegur aldur lækkað. Fólk eldist því hægar í dag.
Lækkað um fjögur ár
Karlar á aldrinum 60–79 ára sýndu mestu framfarirnar, þar sem líffræðilegur aldur hópsins lækkaði að meðaltali um fjögur ár frá 10. áratugnum til þess fyrsta á 21. öldinni.
Ein af ástæðunum er sú að fólk reykir minna. Einn af hverjum þremur fullorðnum á heimsvísu reykti árið 2000, það hlutfall var komið niður í einn af hverjum fimm árið 2022.
Auk þess hafa lífskjör almennt batnað víða um heim. Áður fyrr lifðu margir við erfiðar aðstæður sem gengu á bæði líffræðilegan aldur og lífaldur.
Þó er ekki allt eintóm sæla, því þótt dragi úr reykingum og erfiðisvinnu þá fjölgar þeim sem eru of feitir. Samkvæmt útreikningum vísindamanna væri líffræðilegur aldur okkar enn lægri ef ekki væri fyrir útbreiðslu offitu í dag.
