Löng hár sem vaxa út úr nefinu er ekki beint heillandi sjón. Þess vegna kjósa margir að plokka þessi óæskilegu nefhár. En þetta er slæm hugmynd þar sem hárin gegna mikilvæga hlutverki síu og koma í veg fyrir að smáagnir berist í lungun.

Án nefhára er auðveldara fyrir ryk, ofnæmisvalda og örverur að komast inn í öndunarveginn og það getur aukið hættuna á að fá astma.

Rannsókn ein leiddi því í ljós að fólk með færri nefhár átti í meiri hættu á að fá astma en fólk með fjölmörg nefhár.

Hárplokkun getur valdið ígerð í heila

Þegar nefhárin eru rifin úr hársekkjunum getur það einnig leitt til inngróinna hára – fyrirbæri sem á sér stað þegar hárið vex aftur og beygist inn í húðina. Inngróin hár mynda bólulíka hnúða sem geta valdið ertingu, kláða og verkjum í nefinu.

Tómir hársekkir eiga einnig á hættu að smitast af bakteríum.

Sýking í hársekkjum getur valdið bólgu og sársauka, en hverfur venjulega af sjálfu sér án vandkvæða. Æðar frá nefi eru þó nálægar æðum til heilans og er því örlítil hætta á að smitbakteríur úr nefinu berist í heilann og í versta falli getur það leitt til heilahimnubólgu eða ígerð í heila.

Ef þú vilt minnka líkur á sýkingu og um leið forðast að hárin standi út úr nefinu geturðu einfaldlega klippt hárin í stað þess að plokka þau.