Eftir meira en 60 ár á hafsbotni er ástralska sjúkraskipið Centaur nú komið í leitirnar á rúmlega 2 km dýpi. Japanskur kafbátur sökkti skipinu með tundurskeyti þann 14. maí 1943 út af Brisbane í Ástralíu og af 332 um borð lifðu aðeins 64 af, meðal þeirra ein af 12 hjúkrunarkonum.
Síðan seinni heimsstyrjöldinni lauk hafa ýmsar tilraunir verið gerðar til að finna flakið, en það varð á endanum hinn þrautreyndi, bandaríski flakleitarmaður David Mearns sem fann það ásamt áhöfn sinni. Það gerðist í desember 2009 en nú hefur tekist að ná myndum af flakinu með fjarstýrðum kafbáti. Skipið er enn í heilu lagi að undanteknu stefninu sem hefur brotnað af þar sem tundurskeytið hæfði það. Ákveðin kennimerki eru enn sýnileg, t.d. stórir, rauðir krossar á báðum síðum og talan 47 sem sýnir að þetta er „Australian Hospital Ship 47“, einnig þekkt undir nafninu Centaur.
Sagnfræðingar vonast til að fundurinn varpi loks ljósi á aðstæðurnar sem urðu til þess að skipið sökk. Ástralir telja að Japanir hafi ráðist á skipið án aðvörunar og kröfðust þess á sínum tíma að hinir ábyrgu yrðu dregnir fyrir stríðsrétt. Japanir neituðu hins vegar allri ábyrgð og þótt málið væri rannsakað hvað eftir annað, tókst aldrei að fá á hreint hvaða kafbátur, og þar með hvaða áhöfn, hefði skotið Centaur í kaf.
