Genabreytt mýfluga getur reynst vera það vopn gegn malaríu sem vísindamenn hafa leitað eftir í fjölmörg ár.

Mýflugan, sem er breytt af Mikael Riehle og rannsóknarteymi hans við University of Arizona, getur nefnilega ekki smitað með sníkjudýrinu plasmodium sem orsakar sjúkdóminn.

Mikael Riehle hefur komist að því að með því að breyta erfðafræðilega svonefndum Akt-efnahvata þannig að hann sé stöðugt virkur þá geti mýfluga smituð með plasmodium-sníklinum ekki flutt hann yfir til dýra eða manna.

Enn sem komið er er þessi mýfluga geymd bakvið lás og slá á rannsóknarstofunni. Næsta skref vísindamanna felst í að leggja drög að því hvernig megi koma þessari smitlausu mýflugu út í náttúruna.