Matvörur með sojabaunum eru hollar fyrir hjartað en erfitt er að aðlaga þær vestrænum matarvenjum. Í framtíðinni gætum við þó fengið sojabaunir þegar við fáum okkur kjúkling. Fu-Hung Hsieh, prófessor við Missouriháskóla í Bandaríkjunum, hefur nefnilega þróað gervikjúklingakjöt sem unnið er úr sojabaunum.
Til að fá eitthvað til að bragðast og líta út eins og kjúklingur þarf aðeins réttu bragð- og litarefnin og það hefur verið gert áður en Fu-Hung Hsieh gengur skrefinu lengra og líkir eftir trefjauppbyggingunni í kjúklingakjöti. Það er því ekki nóg með að nýja afurðin bæði smakkist og líti út eins og kjúklingur, heldur verður tilfinningin, þegar kjötið er tuggið, einnig hin sama. Og þegar kjötið er skorið eða slitið sundur, verður heldur ekki annars vart en maður sé með kjúkling í höndunum.
Soja-kjúklinginn bjó Fu-Hung Hsieh til með því að einangra sojaprótín úr fitusneyddu sojamjöli. Ásamt íbættum efnum tekur svo við ferli þar sem vatni er bætt í, afurðin soðin og þjöppuð undir þrýstingi.
