Það er ekki að ástæðulausu sem skotvopn eru bönnuð í geimnum. Ef geimfari hleypti af skammbyssu t.d. í ISS-geimstöðinni, yrðu afleiðingarnar allt aðrar en þær sem við þekkjum á jörðinni.
Sjálfur myndi geimfarinn kastast aftur á bak af miklum krafti og myndi að öllum líkindum skaddast alvarlega af árekstri sínum við vegg eða einhver þeirra fjölmörgu tækja sem eru um borð. Og hugsanlegt fórnarlamb hans myndi einnig þeytast aftur á bak. Afleiðingin yrði sem sagt tveir særðir eða jafnvel dauðir geimfarar sem svifu hjálparlausir um meðan blóðið úr þeim myndaði rauða, svífandi dropa. Skotið gæti líka gert gat á útvegg með þeim afleiðingum að allt loft sogaðist út og öll áhöfnin færist.
Ef geimfari í geimgöngu skyti úr skammbyssu yrðu áhrifin þau sömu og af lítilli eldflaug. Geimfarinn tæki að hreyfast í öfuga átt við kúluna.
Þessi aðferð var reyndar notuð í júní árið 1965 þegar Bandaríkjamaðurinn Edward White fór í geimgöngu frá geimfarinu Gemini 4. Hann hafði með sér litla þrýstibyssu, sem einfaldlega var gerð úr tveimur kútum með köfnunarefni undir miklum þrýstingi og litlum stút. Þegar hann opnaði stútinn, virkaði gasið líkt og fjölmargar örsmáar byssukúlur og með því að miða stútnum gat hann flutt sig í þá átt sem hann vildi.
