Ísraelski glímukappinn Yossef Gutfreund vaknar upp við einhvern skarkala utan við hóteldyrnar kl. 4.30 að morgni þess 5. september 1972 og reynir óttasleginn að vekja aðra félaga sína í ólympíuliðinu sem sofa í herberginu. Fyrir utan er hópur vopnaðra manna sem reynir að opna læsinguna á hurðinni.
Hinn 195 cm hái Youssef kastar sér á hurðina til að varna mönnunum inngöngu en þeim tekst að brjóta sér leið inn í herbergið og skömmu síðar hafa þeir tekið 11 Ísraela í gíslingu.
Hótuðu að skjóta gíslana
Þessir vopnuðu menn eru meðlimir í palestínsku hryðjuverkasamtökunum Svarta september sem hafa nú fært blóðug átök milli Palestínumanna og Ísraela til Ólympíuleikanna í München.
Hryðjuverkamennirnir kröfðust m.a. þess að 235 palestínskum föngum yrði sleppt úr fangelsum Ísraelsmanna. Væru kröfur þeirra ekki uppfylltar myndu þeir drepa hvern gíslinn af öðrum með reglulegu millibili.
Vopnaðir og grímuklæddir hryðjuverkamenn drápu alla ísraelska gísla sína.
Hryðjuverkamennirnir lausir úr haldi
Á næstu dögum reyna þýsk yfirvöld að semja við hryðjuverkamennina en að lokum neyðast þau til að útvega þeim flugvél undir alla gíslana sem og vígamennina. Flugvélin átti að fljúga með hópinn til Egyptalands.
Á flugvellinum leggur sérsveit lögreglunnar til atlögu í von um að frelsa gíslana en björgunaraðgerðin mistekst hrapalega. Allir gíslarnir láta lífið ásamt fimm hryðjuverkamönnum og einum sérsveitarmanni – samtals 17 manns.
Þrír hryðjuverkamenn eru teknir til fanga en þeir eru látnir lausir mánuði síðar, þegar Svarti september hafði rænt þýskri flugvél og hótaði að sprengja hana í loft upp væri þeim ekki sleppt.
