Árið 2005 fundu þýskir fornleifafræðingar við háskólann í Tübingen undarlegan stein í helli í sunnanverðu Þýskalandi. Þessi litli steinn virtist ekkert vera neitt sérlega merkilegur en fornleifafræðingarnir vissu að hann væri brot af öðrum steinbrotum sem höfðu áður fundist á sama stað.
Þeir höfðu á réttu að standa. Þegar búið var að púsla öllum steinunum saman voru vísindamennirnir með nokkuð sérkennilegt fyrirbæri í höndunum: Dildó úr setbergi sem er trúlega meðal elstu kynlífsleikfanga sögunnar.
Þessi forsögulegi steinlimur er um 20 cm langur og búinn til úr setbergi.
Steinninn er 28.000 ára gamall
Þessi 20 cm langi steinlimur fannst í hinum víðfrægu Hohle Fels-hellum, þar sem vísindamenn höfðu áður fundið marga einstaka muni frá forsögulegum tíma – meðal annars hafa þeir fundið í hellunum einhverjar elstu mannafígúrur sem og frumstæð hljóðfæri.
Öskulagið sem steinar þessir fundust í sýnir að limurinn var mótaður fyrir um 28.000 árum. Stærð hans og slétt yfirborðið bendir til þess að hann hafi líklega verið notaður sem dildó, að mati vísindamanna.
Samkvæmt Nicholas Conrad prófessor við háskólann í Tübingen sem hefur tekið þátt í að rannsaka steinliminn er hann „einkar haganlega slípaður“.
Grikkir elskuðust með brauði
Á sögulegum tímum hafa slíkir munir fundist í Grikklandi til forna. Það er meira að segja talað um gripina í nokkrum fornum grískum gleðileikjum og eins má sjá myndir af þeim á grískum vösum.
Grískir dildóar voru jafnan búnir til með því að fylla leðurhulstur með ull. Samkvæmt sumum fræðimönnum var önnur gerð þeirra svokallað olisbokollix – eins konar hart ofnbakað brauð mótað eins og limur manns í fullri reisn.
