Róbótar verða stöðugt aflmeiri, hraðari og sífellt gáfaðri. Það gerir þá ekki bara að hæfari við að aðstoða á byggingarsvæðum, verksmiðjum eða á sjúkrahúsum – þeir geta líka orðið hættulegri ef þeir falla í rangar hendur.
Nokkur leiðandi róbótafyrirtæki hafa því sent frá sér sameiginlega viðvörun: Róbóta ætti aldrei að nota sem vopn.
Fyrirtækin heita því að þau muni aldrei búa til róbóta með það að markmiði að skaða aðra.
En sama hvernig fyrirtæki reyna að tryggja vörur sínar, þær geta orðið hættulegar.
En hversu hættulegir eru róbótar í raun og veru? Hér eru fimm nýjustu róbótar þessara fyrirtækjanna og úttekt á því hversu mikil hætta stafar af þeim.
SÁ HRAÐSKREIÐI
Vopnaður hundur hrellir internetið
Go1 vegur einungis 12 kíló og getur náð 17 km hraða á klst., og er einn hraðskreiðasti og léttasti þjarkurinn á markaði.
„Hundur“ þessi getur borið fimm kg og er ætlað að geta sinnt margvíslegum verkefnum.
Go1 er falur fyrir „einungis“ tæpa 2.700 dali. Unitree Robotics, sem framleiðir Go1, hefur markvisst stefnt að því að þessi þjarkur sé eins ódýr og kostur er, til þess að einstaklingar hafi ráð á honum – en ekki bara fyrirtæki eða þjóðlönd, sem eru núna helstu kaupendur stærri róbóta og einnig viðlíka róbótahunda.
Go1 er einkum frægur fyrir að geta beitt sjálfvirku skotvopni á myndskeiði, sem almennur borgari birti á netinu.
Hversu hættulegur er hann?
Það er hægt að útbúa Go1 með sprengjuvörpum sem og sjálfvirkum skotvopnum, eins og má sjá á víðfrægu YouTube-myndskeiði.
Mat: Hættulegur.
EFTIRLIT
Lipur eftirlitsbotti kannar gasver
Svissneska fyrirtækið ANYbotics framleiðir fjórfætta róbótann ANYmal. Róbótinn er sterkbyggður og getur komist yfir allskonar vegleysur, trítlað upp brattar tröppur, klofað yfir hindranir og holur og þrengt sér í gegnum þröngar gáttir.
Róbótinn er búinn m.a. leysi-skanna og hitamyndavél, og hægt er að klæðskerasauma hans fyrir mismunandi verkefni, t.d. eftirlit og viðhald ýmis konar.
Hann er einkum ætlaður til notkunar í olíu- og gasiðnaði. Með gasskynjara sínum getur róbótinn þefað mögulegan leka uppi.
ANYmal getur hreyft sig til hliðanna, fram á við og aftur á bak og þarf því aldrei að snúa sér. Nýjasta gerð róbótans er með hjólabúnað og getur rúllað um með allt að 22 km/klst.
Hversu hættulegur er hann?
ANYmal er hannaður þannig að honum er ekki kleift að skemma olíu – og gasleiðslur. Hann er mjög hægfara (4,7 km á klst.) og er ætlaður til að sinna eftirliti.
Mat: Lítið hættulegur.
SENDILLINN
Hauslaus lagerþjarki og sendill
Fyrirtækið Agility Robotics í Oregon, BNA, hefur þróað tvífætta þjarkann Digit – sem óháð því að hann er hauslaus – hreyfir sig eins og manneskja.
Skrokkurinn er alsettur skynjurum, þannig að bottinn kemst framhjá margvíslegum hindrunum. Hann er hugsaður sem dugmikill lagerstarfsmaður eða sendill, sem getur borið allt að 18 kg í hverri ferð.
Þessi 1,58 cm hái og 45 kg þungi þjarkur notar arma sína til að halda jafnvægi eða ýta frá sér fyrirstöðum til að forðast fall.
Digit getur gengið aftur á bak, til hliðar og farið yfir torfærur. Þjarkurinn getur gengið á hraða sem nemur um 5,4 km/klst, en það þykir röskur gangur manna.
Hversu hættulegur er hann?
Styrkur Digits og hraði er ekki mikill, en hakkarar gætu auðveldlega nýtt sér sendilinn til að skila af sér sprengjum hverskonar.
Mat: Lítið hættulegur.
VINNUHESTURINN
Ökubottinn þolir geislavirkni
Kanadíska fyrirtækið Clearpath Robotics hefur þróað hinn tæplega eins metra langa og 50 kg þunga Husky. Husky getur náð hraða sem nemur 3,6 km/klst.
Búinn fjórum torfærudekkjum getur hann plægt sig í gegnum leðju, straumvötn og kafdjúpan snjó.
Husky getur borið heil 75 kg og fæst með 360 gráðu hringsjá, róbótaarmi og þrívíddar myndavél sem greinir fjarlægðir hverju sinni.
Vísindamenn við University of Toronto hyggjast nýta þennan þjarka til að undirbúa margvíslega könnun á öðrum plánetum.
Hversu hættulegur er hann?
Hakkarar geta auðveldlega nýtt sér veikleika og eiginleika Huskys til að t.d. meðhöndla geislavirk efni og þannig valdið gríðarlegum usla. En það hvað þjarkinn er svifaseinn dregur nokkuð úr hættunni.
Mat: Afar hættulegur.
FJÖLLISTAMAÐURINN
Þjarki slær í gegn á netinu
Bandaríska fyrirtækið Boston Dynamics framleiðir torfæruhundinn Spot, sem er lunkinn við að fara upp tröppur, getur komist yfir margvíslegar hindranir og farið leiða sinna um vegleysur.
Auglýsingamyndböndum er Spot er jafnan drreift vítt og breitt – árið 2017 náði myndskeið af honum að opna dyr í efsta sæti á á YouTube.
Spot er fyrirtaks varðhundur, getur vaktað svæði og gert þrívíddarkort af umhverfi sínu. Myndavélar gera honum kleift að fara í allar áttir án þess að rekast á fyrirstöður.
Hámarkshraði Spots með 14 kg farm er 6 km/klst og hægt er að fest á þjarkann arm, sem getur snúist og gripið hluti.
Hversu hættulegur er hann?
Hægt er að setja skotvopn á Spot, rétt eins og Go1 – en Boston Dynamics mæla eindregið gegn því.
Mat: Hættulegur
