Tækni
Lestími: 2 mínútur
Það þarf ekki lengur að vera skammaryrði að hafa tíu þumalputta.
Hópur vísindamanna hefur nefnilega fundið upp snjallþumal sem gerir kleift að leysa með annarri hendi sum verkefni sem annars krefjast beggja handa.
Þessi vitvél er þrívíddarprentuð og sett á handarjaðarinn til hliðar við litla fingurinn. Þannig hefur notandinn heila tvo þumalfingur á hendinni og það gerir t.d. mögulegt að flysja banana með annari hendi.
Snjallþumlinum er stjórnað gegnum þráðlausa skynjara sem komið er fyrir undir stórutánum. Hvor skynjari stýrir ákveðinni hreyfingu. Með því að þrýsta á skynjarana er þannig unnt að stýra snjallþumlinum.
Þessi þrívíddarprentaði þumalfingur er þó ekki bara sniðugt áhald. Hann veitir okkur líka mikilvæga þekkingu á því hvernig heilinn getur aðlagað sig.
Tilraunin sýndi að eftir einungis fimm daga þjálfun hefur heilinn aðlagast þannig að þátttakendum var farið að finnast eins og þumallinn væri hluti af líkamanum.
Viku eftir að tilrauninni lauk hafði þó dregið verulega úr þessari tilfinningu. Það bendir til að áhrif snjallþumalsins á heilann endist ekki til langframa. Það eiga vísindamennirnir þó eftir að fá staðfest.
Birt 19.08.2021
MORTEN MØLLER BERTELSEN
