Flutningar – Flug
Lestími: 4 mínútur
Þann 24. október 2003 lenti Concorde-þota eftir síðasta farþegaflug sitt. Þessi bresk-franska þota var í notkun í 27 ár og ein um að ná yfir hljóðhraða en að lokum varð reksturinn of dýr og Concorde-þotunum var lagt.
Síðan hafa ýmist flugvélaframleiðendur haft uppi áætlanir um að endurvekja hljóðfráar farþegaþotur og Boom Supersonic hefur nú komist stóru skrefi nær því að gera hljóðfráu þotuna Overture að veruleika.
Eitt af stærstu flugfélögum heims, United Airlines, hefur pantað 15 háhraðaþotur frá Boom Supersonic og jafnframt hafa fyrirtækin gert með sér samning um þróun bæði þotunnar og þess sérstaka eldsneytis sem ætlunin er að nota.
London– New York á 3 tímum
Boom Overture á að ná 2.000 km hraða og með þessu nýja eldsneyti á vélin ekki að losa neinn koltvísýring.
Hraðinn tvöfaldur
Farþegaþotur fljúga yfirleitt á um 800 km hraða en flughraði Overture verður 2.000 km/klst. og þannig verður t.d. mögulegt að ferðast milli Kaupmannahafnar og New York á 3-4 tímum.
Öryggið í forgangi
Það á ekki verða neitt hættuspil að ferðast með Overture. United Airlines krefst þess að þotan standist allra ströngustu öryggiskröfur og hætta á slysi verði því nánast engin.
Hreyflarnir menga ekki
Til að þotan verði sem umhverfisvænst eiga hreyflarnir ekki að brenna hefðbundnu þotueldsneyti heldur SAF „sjálfbæru eldsneyti“, framleiddu úr aukaafurðum landbúnaðar.
Concorde-þotan var hönnuð á sjöunda áratugnum og verkfræðingar nútímans þurfa því að byrja alveg frá grunni.
Til að sjá kemur nýja þotan til með að minna á Concorde með þríhyrndri lögun en skrokkurinn verður hins vegar gerður úr nýjum og léttum blendingsefnum.
Hreyflarnir verða líka af nýrri gerð, lágværir og án eftirbrennara en geta þó ýtt þessari 80 tonna þotu á 2.000 km hraða. Concorde-vélarnar þurftu eftirbrennara sem juku eldsneytisnotkun til muna.
Hljóðfráa þotan verður til að byrja með látin flytja farþega yfir Atlantshaf, milli Evrópu og Ameríku.
Overture nær talsvert meira en tvöföldum hraða hefðbundinnar farþegaþotu.
Um borð verður rými fyrir 88 farþega, alla á lúxusfarrými.
Það er þó eldsneytið sem einblínt er á hjá Boom Supersonic. Dregið verður úr eldsneytisnotkun með því að hámarka straumlínulögun og eldsneytið verður svonefnt SAF-eldsneyti, „sustainable aviation fuel“.
SAF verður sjálfbært eldsneyti sem á að vinna úr aukaafurðum af ökrum bænda og koma í stað olíu. Samkvæmt áætluninni á það að gera flugið kolefnishlutlaust.
Overture á að hefja sig til flugs árið 2025 en hefja farþegaflug árið 2030.
Birt 23.08.2021
EBBE RASCH
