Nýjar rannsóknir sýna að það geti skaðað fóstrið ef þunguð kona notar hass.
Vísindamenn við Gagliariháskóla á Ítalíu gáfu þunguðum rottum efnið THC sem er virka efnið í hassi og fylgdust svo með atferli afkvæmanna.
Í ljós kom að karlkyns afkvæmi urðu næmari fyrir THC en ungar mæðra sem ekki höfðu fengið efnið. Hjá kvenrottum mældist enginn munur.
Rottutilraunir sýna að VTA-heilastöðin verður mjög virk af efninu THC.
Vísindamennirnir vara þungaðar konur við að nota kannabis
Vísindamennirnir komust síðan að því að breytingar í heila karlkyns unga stöfuðu af því að taugafrumur í heilastöðinni VTA sýndu mikla virkni þegar þær komust í snertingu við dópamín.
VTA-heilastöðin gegnir stóru hlutverki í umbunarkerfi heilans sem einmitt notar dópamín til að skapa vellíðan.
Heilasérfræðingar hafa talsvert velt fyrir sér tengslum milli kannabis og skítsófreníu (eða geðklofa) en þar er aukin dópamínframleiðsla meðal einkenna.
Ítölsku vísindamennirnir þora ekki að draga þá ályktun að inntaka THC á meðgöngu geti leitt til skítsófreníu í mönnum en að fengnum þessum niðurstöðum vara þeir þó við því að vanfærar konur noti kannabis, t.d. sem lyf gegn morgunógleði.
