Konstantin Tsiolkovskji (1857-1935) var frumkvöðull á sviði þróunar eldflauga og geimrannsókna. Strax árið 1903 lýsti hann því í ritsmíð hvernig hægt væri að yfirvinna þyngdaraflið og komast á braut um jörðu með því að nota fjölþrepa eldflaug sem m.a. væri knúin fljótandi súrefni – rétt eins og Bandaríkjamenn gerðu 65 árum síðar í Apollo-geimferðunum.
Tsiolkovskji hélt sig þó einvörðungu við fræðasviðið og reyndi aldrei sjálfur að byggja eldflaugar. Hann var mannafælinn einfari sem varði mestum hluta ævinnar í afskekktum bjálkakofa og lengi var hann einskis metinn af samtíðarmönnum. Á 3. áratugnum uppgötvaði þýski eðlisfræðingurinn Hermann Oberth verk hans og upp frá því naut Tsiolkovskji æ meiri viðurkenningar.
