Mexíkóska salamandran býr yfir alveg einstæðum hæfileikum.
Frá sjónarhóli líffræðinnar lifir hún á lirfustigi alla ævi og verður því eiginlega aldrei „fullorðin“. En hún hefur líka ótrúlega hæfni til að endurskapa útlimi sína ef þeir skaddast.
Tilraunir sýna að hún getur líka endurmyndað heilavef og önnur líffæri, auk þess sem líffæraígræðslu milli einstaklinga fylgja engin vandkvæði.
Vantar gen
Vísindamenn hafa í áratugi reynt að komast að því hvernig þetta getur gerst og nú hefur þeim orðið nokkuð ágengt.
Hópur vísindamanna hjá Líffræðistofnun Vínarborgar í Austurríki hefur loksins kortlagt erfðamengi salamöndrunnar í heild.
Þetta var risavaxið verkefni því í erfðamenginu eru 32 milljarðar basapara og það er tífalt á við erfðamengi mannsins.
Komið hefur í ljós að margvísleg gen eru eins og í öðrum froskdýrum. Þessi gen eiga vafalaust þátt í hæfninni til að endurmynda útlimi.
Heilinn gerir við sig sjálfur
Í salamöndruna vantar hins vegar genið PAX3 sem gegnir hlutverki varðandi þróun tauga og vöðvavefja. Annað gen, PAX7, hefur tekið við þessu hlutverki.
Takist mönnum að finna nákvæmlega ástæðurnar fyrir sérstakri hæfni salamandranna, kynni að verða unnt að líkja eftir þeim og menn vonast þá til að m.a. yrði unnt að endurmynda heilavef í mönnum og auðvelda líffæraígræðslur.
