Súkkulaði virðist ekki beinlínis vera líklegt til að koma í veg fyrir veikindi.
Þessi vinsæla fæðutegund skiptir á hinn bóginn sköpum í nýlegri rannsókn sem vísindamenn við lýðheilsudeild Harvard-háskóla stóðu fyrir.
Niðurstöður rannsóknar þessarar sýna nefnilega að súkkulaði kann að hafa fyrirbyggjandi áhrif á einn algengasta langvinna sjúkdóminn í dag og vísindamenn upplýsa á afar nákvæman hátt hversu mikið magn af þessu stökka, sæta nautnaefni er þörf fyrir.
Með þessu er átt við að súkkulaði virðist geta minnkað hættuna á að þróa með sér sykursýki 2, segja vísindamennirnir.
Milljónir þjást af sykursýki 2
Um 850 milljón manns um allan heim þjást af sykursýki 2.
Sjúkdómurinn er langvinnur og getur leitt til annarra hættulegra kvilla á borð við hjarta- og nýrnasjúkdóma.
Eitt algengasta ráðið gegn sykursýki 2 felst í hreyfingu og heilnæmri fæðu.
Liður í rannsókn vísindamannanna fólst í skoðun gagna alls 192.208 einstaklinga sem svarað höfðu spurningalista um fæðuinntöku sína fjórða hvert ár.
Með hliðsjón af svörunum tókst vísindamönnunum að finna tengsl á milli aukinnar súkkulaðineyslu annars vegar og algengi sykursýki 2 hins vegar.
Súkkulaðitegund skipti ekki máli
Niðurstöðurnar leiddu í ljós að þeim sem neyttu meira en fimm súkkulaðiskammta á viku sem hver um sig vó 28 grömm, var 10% síður hætt við að þróa með sér sykursýki 2 en ella. Engu máli skipti hvaða tegund af súkkulaði um var að ræða.
Nýlegar rannsóknir sýna að áhættan við að borða mikið unninn mat getur verið mun meiri en flestir hafa haldið hingað til.
Þeir einstaklingar sem borðuðu fimm skammta af dökku súkkulaði á viku og ekki borðuðu ljóst súkkulaði, voru í 21% minni hættu á að þróa með sér sykursýki 2 en ella, tilgreindu vísindamennirnir í rannsókninni.
Dökkt súkkulaði var í rannsókninni skilgreint sem súkkulaði sem innihélt á bilinu 50 til 80 prósent af kakói.
Þá kom enn fremur í ljós að hættan á sykursýki 2 minnkaði um þrjú prósentustig fyrir hvern 28 gramma skammt af dökku súkkulaði sem neytt var.
Kann að innihalda gagnleg efni
Súkkulaði hefur að geyma tiltekin efni sem vísindamenn telja að geti haft þessi gagnlegu áhrif á sykursýki.
Dökkt súkkulaði er greinilega með mesta magnið af þessum vænlegu efnum, skrifa vísindamennirnir.
Þeir leggja engu að síður áherslu á að framkvæma þurfi fleiri rannsóknir áður en hægt verði að staðhæfa neitt um fyrirbyggjandi eiginleika súkkulaðis og hægt verði að sannreyna þessi tengsl.
Rannsóknin birtist í vísindatímaritinu BMJ.
