Fjöldi of þungra jarðarbúa hefur þrefaldast síðan 1975 og verði ekkert að gert verður helmingurinn kominn í yfirþyngd árið 2035.
Þessi aðvörun berst nú frá samtökunum World Obesity Federation og fjölmörgum sérfræðingum sem hafa áhyggjur af offitufaraldri víða um heim. Sérfræðingarnir leitast nú líka við að auka skilning sinn á því sem veldur þessu ástandi.
Nú hafa vísindamenn, m.a. hjá Trentháskóla í Nottingham, sýnt fram á að efni úr þarmabakteríum gætu átt þátt í tilurð aukakílóanna.
Vísindamennirnir skoðuðu ýmis eiturefni, svonefnd endotoxín sem er að finna í frumuveggjum þarmabakteríanna og losna þegar frumuveggirnir bresta.
Í heilbrigðum meltingarvegi eru þessi úrgangsefni eðlilegur hluti af lífsferli bakteríanna og starfi þarmanna. Efnin geta hins vegar orðið til vandræða ef þarmaveggirnir veiklast, verða óþéttir og efnin komast í blóðrásina.
Fyrri rannsóknir hafa leitt í ljós að mögulega séu þarmaveggir fólks í ofþyngd ekki jafn stöðugir og vera ætti og í þessari rannsókn skoðuðu vísindamennirnir sérstaklega áhrif endotoxína á fitufrumur líkamans.
Í ljós kom að endotoxínin virtust skaða frumurnar og gera þeim erfiðara fyrir að umbreyta fitunni í brúna og brennanlega fitu. Þetta bendir til að hvítfitufrumurnar safnist upp, valdi þyngdaraukningu og auki til viðbótar hættuna á efnaskiptasjúkdómum á borð við sykursýki 2.
Eitt gen ákvarðar hversu margar brúnar og hvítar fitufrumur mýs hafa og þar með hversu grannar þær verða. Vinstra megin á myndinni sérðu brúnu fitufrumurnar og til hægri hvítu fitufrumurnar.
Minni brún fita
Þátttakendur í rannsókninni voru 156, þar af 63 í ofþyngd og 26 höfðu farið í fituaðgerð.
Bæði blóð- og fitusýni voru tekin og þau sýndu m.a. að hvítar fitufrumur úr þátttakendum í ofþyngd voru síður móttækilegar fyrir umbreytingu í brúna fitu en samsvarandi frumur úr fólki sem ekki taldist of þungt.
Fimm gerðir sveppasýkinga ógna heilbrigði í heiminum
Í sjónvarpsþáttaröðinni „The Last of Us“ fer sveppasýkingarfaraldur um heiminn. Hugmyndin er ekki alls kostar út í hött. Kynntu þér þá fimm sveppi sem þú þarft að óttast – sumir eru þegar í líkamanum.
Vísindamennirnir segja þetta í samræmi við meira magn endotoxína í blóði þeirra sem voru of þungir.
Enn fremur kom í ljós að fituaðgerðir virtust draga úr magni endotoxína í blóði og þannig bæta heilbrigði fitufrumnanna.
