Þegar Eiffelturninn var fullgerður í París árið 1889 sagði Gustave Eiffel, en fyrirtæki hans sá um smíðina, að “málning er mikilvægasta efnið þegar kemur að því að vernda byggingu úr málmi” – þar sem málningin kemur í veg fyrir að ryð myndist. „Mikilvægast er að koma í veg fyrir ryð,“ sagði hann einnig.
En það verkefni virðist hafa mistekist.
Skýrsla sérfróðra verkfræðinga, sem lekið var til fjölmiðla, sýnir að Eiffelturninn er mjög ryðgaður og þarfnast gagngerra endurbóta. „Þetta er mjög einfalt. Ef Gustave Eiffel heimsótti staðinn núna fengi hann hjartaáfall“, er haft eftir ónefndum yfirmanni í starfsliði Eiffelturnsins.
En í stað raunverulegra endurbóta er nú verið að mála Eiffelturninn fyrir um átta milljarða íslenskra króna vegna Ólympíuleikana, sem haldnir verða í París árið 2024 .
Sem liður í undirbúningi fyrir Ólympíuleikana í París árið 2024 hefði átt að vera búið að mála um þriðjung Eiffelturnsins en, vegna tafa í kórónuveirufaraldrinum, hefur aðeins 5% turnsins verið endurmálaður.
Kennileiti gæti orðið dauðagildra
Ef niðurstöður skýrslunnar, sem lekið var, eru réttar gæti kennileiti Parísar orðið svo skemmt af ryði að turninn, sem vegur 10.100 tonn og tekur á móti sjö milljónum gesta á hverju ári, gæti átt á hættu að hrynja. Málningin getur aðeins komið í veg fyrir skemmdir – ekki lagað þær – segir í skýrslunni.
Það er ekki í fyrsta skipti sem endingartími Eiffelturnsins kemst í fréttirnar. Árið 1925 frétti svindlarinn Robert V. Miller að borgarstjórn Parísar íhugaði að losa sig við turninn – og því reyndi Miller að selja hann.
Fyrirtækið sem ber ábyrgð á rekstri Eiffelturnsins hefur hingað til neitað að loka turninum fyrir gestum þar sem það myndi kosta of mikið í töpuðum aðgangseyri.
