Dýraeistu áttu að lengja ævina
1889 sprautaði afríski læknirinn Charles-Édouard Brown-Séquard í sig þykkni úr eistum hunda og hamstra.
Hugmyndin var sú að aukið magn testósteróns í líkamanum myndi halda honum ungum og kraftmiklum. Sjálfur sagði læknirinn að honum hefði fundist hann yngjast við meðferðina.
Afrískur læknir sprautaði í sig eistnaþykkni til að verjast öldrun.
Í rauninni leiddi þetta þó ekki til langlífis. Fjórum árum eftir fyrstu sprautuna lést Brown-Séquard, 76 ára gamall.
Síðari tíma rannsóknir hafa ekki leitt í ljós nein merki þess að dýraeistu hafi nein áhrif á öldrun.
En þótt eistun reyndust ekki lykill að langlífi varð tilraunin ekki alveg til einskis. Brown-Séquard telst sem sé meðal frumkvöðla í hormónameðhöndlun.
Saur yngir upp ónæmiskerfið
Saur getur lengt ævina, alla vega ef trúa má orðum vísindamanna hjá Max Planck-stofnuninni.
Þeir skiptu út þarmaflóru tannkarpa og settu í staðinn þarmaflóru úr ungum fiskum.
Tannkarpi lifir lengur ef hann fær þarmabakteríur úr yngri fiski.
Í tilrauninni voru þarmabakteríur fyrst fjarlægðar alveg með sýklalyfjum og fiskarnir síðan fóðraðir á saur ungfiska.
Vísindamennirnir sneru dæminu líka við og settu þarmaflóru gamalla fiska í unga. Niðurstöðurnar sýndu að gömlu fiskarnir sem fengu nýja þarmaflóru lifðu 41% lengur en ungfiskar sem fengu þarmaflóru úr gömlum tannkörpum.
Enn er ekki vitað hvað veldur því að þarmaflóra ungfiska getur skrúfað tímann til baka en kenningin er sú að ungfiskasaurinn styrki ónæmiskerfið en það veiklast með aldrinum.
Þegar gagnlegar bakteríur koma í þarmana lifnar yfir ónæmiskerfinu og þannig hægist á öldrun.
Ungt blóð bætir heilastarfsemi
Minni gamalla músa batnar og þær eiga auðveldara með að rata eftir að blóðplasma úr ungum músum er sprautað í þær. Þetta sýna ýmsar tilraunir í BNA.
Þegar gamlar mýs fá ungt blóð, batnar heilastarfsemin.
Enn er vísindamönnunum ekki ljóst hvernig þetta unga blóð hefur áhrif á heilann en tilraunirnar benda til að prótín í blóðinu virki á ný taugafrumur sem þegar eru til staðar í heilanum.
Tilraunir á músum er auðvitað ekki hægt að yfirfæra umsvifalaust á menn og enn er ekkert sem styður það að blóðgjöf hafi sams konar jákvæð áhrif á fólk.
Það kemur þó ekki í veg fyrir að fyrirtæki selji gömlu fólki ungt blóð. Meðferðin felst í blóðgjöf 2 lítra af blóðplasma úr fólki yngra en 25 ára. Verðið er 8.000 dollarar á lítrann.
Forn baktería með eilíft líf
Árið 2009 fann rússneski vísindamaðurinn Anatoli Brouchkov bakteríu í sífreranum í Síberíu. Bakterían, Bacillus F, er orðin 3,5 milljóna ára gömul en sýnir engin merki öldrunar.
Bakteríunni var sprautað í mýs og bananaflugur og hún reyndist styrkja ónæmiskerfið og örva frumuskiptingu.
Bakterían Bacillus F er 3,5 milljóna ára en sýnir engin merki öldrunar.
Árið 2013 steig Brouchkov skrefinu lengra og sprautaði bakteríunni í sjálfan sig. Hann segir þá tilraun lofa góðu: „Ég fór að vinna lengur og hef ekki fengið flensu í meira en tvö ár,“ sagði hann tveimur árum eftir fyrstu sprautuna.
Hvort bakterían hefur haft einhver áhrif á hann er þó alveg ósannað.
Hann hefur heldur enga kenningu um ástæðu þess að bakterían geti lifað svona lengi.
Vísindamenn hafa kortlagt erfðamengi hennar en hefur enn ekki tekist að finna þau gen sem gera henni kleift að sigrast á dauðanum.
