Í seinni heimsstyrjöld var fólk mjög háð reiðhjólum því eldsneyti á bíla eða almenningsvagna var af skornum skammti. Það bitnaði því mjög harkalega á öllum almenningi þegar Hitler skipaði svo fyrir þann 6. október 1944 að hinir aðþrengdu hermenn hans skyldu gera upptæk öll reiðhjól í öllum hersetnum ríkjum.

Leiftursókn gegn hjólandi fólki

Í Hollandi spruttu þýskir hermenn fram framan við þjóðminjasafnið í Amsterdam. Gegn háværum mótmælum eigendanna voru reiðhjólin rifin af þeim og hermennirnir hjóluðu burt á ránsfengnum.

Í Danmörku komu vörubílar að hjólaverslunum í öllu landinu. Vopnaðir hermenn stóðu vörð við dyrnar meðan aðrir hermenn báru öll hjól úr verslunum út á vörubílana.

Þjóðverjar í klemmu

Á sama tíma voru reiðhjól frá hinum hersetna hluta Norður-Ítalíu líka á leið til Þýskalands, þar sem her Hitlers skorti nauðsynlega farartæki til að koma hermönnum til vígstöðvanna. Rússarnir voru nú aðeins 600 kílómetra frá Berlín en breskir og bandarískir hermenn höfðu frelsað allt Frakkland og stærstan hluta Belgíu. Mörg þúsund hjólum var stolið í þessari aðgerð.

John T. Lauridsen hjá Konunglega bókasafninu í Kaupmannahöfn hefur rannsakað þetta og komist að þeirri niðurstöðu að skipun Hitlers hafi komið úr byrginu í Úlfavirkinu í núverandi Póllandi en þaðan stjórnaði Foringinn baráttunni gegn framrás Rauða hersins.

Danir sluppu vel

Í Danmörku létu Þjóðverjar nægja að leggja hald á reiðhjól sem enn voru óseld í verslunum. Þeir fóru gætilega vegna þess að þeir vildu ekki lama danskt samfélag með þeim afleiðingum að straumur mikilvægra matvara yfir til Þýskalands stöðvaðist.