Hve margar flugvélar hafa horfið í Bermúda-þríhyrningnum?
Þann 5. desember tók Charles Taylor á loft í sprengjuflugvél sinni frá bandarískri flotastöð. Með honum í för voru fjórar aðrar flugvélar með 13 flugnemendur sem tóku einnig þátt í þessum sprengjuæfingum.
Eftir um tvo tíma tók flotastöðin á móti skeytasendingum sem bentu til að áttavitar flugvélanna virkuðu ekki sem skyldi og að flugsveitin stefndi í ranga átt.
Síðustu skilaboð frá Taylor voru móttekin skömmu fyrir sólsetur. Ekkert er vitað hvað varð um flugvélarnar.
Helstu ráðgátur flugsins
Sagan geymir fleiri dæmi um flugvélar sem hafa horðið við dularfullar aðstæður.
1937: Drottning flugsins
Hin heimsþekkta Amelia Earhart varð fyrst kvenna til að fljúga ein yfir Atlantshafið árið 1928. Hún hvarf árið 1937 þegar hún var að reyna að fljúga hringinn í kringum hnöttinn.
1956: Atóm-flugvél hvarf í skýjunum
Þann 10. mars 1956 voru fjórar herflugvélar á leiðinni frá BNA til Marokkó þegar ein vélin hvarf í skýjunum. Sama dag tilkynnti varnarmálaráðuneyti BNA að um borð í henni hafi verið tvær ósamsettar kjarnorkusprengjur.
1962: 96 hermenn hverfa sporlaust
Þann 16. mars 1962 hvarf bandaríska fraktflugvélin Flight 739 sporlaust. Flogið var frá Guam og voru 96 hermenn innanborðs. Samkvæmt yfirvöldum kann sprenging að hafa grandað flugvélinni.
Tímaritsgrein gerði Bermúdaþríhyrninginn hættulegan
Flugsveit Taylors hvarf á svæði milli Flórída, Bermúda og Puerto Rico sem varð seinna þekkt sem Bermúda-þríhyrningurinn.
Sú hugmynd að svæði þetta væri sérlega hættulegt kom fyrst fram í tímaritsgrein árið 1950. Á næstu árum birtust fleiri greinar þar sem greint var frá öðrum flugvélum sem hurfu á þessu svæði.
Fimm bandarískar herflugvélar voru við æfingar þegar þær hurfu sporlaust árið 1945 í Bermúda-þríhyrningnum.
Erfitt er að átta sig á fjölda horfinna flugvéla því að svæðið er ekki nákvæmlega skilgreint en talið er að færri en fimmtán flugvélar hafi farist eða horfið þar frá árinu 1945.
Samkvæmt stofnuninni National Oceanic and Atmospheric Administration sem rannsakar hafið og lofthjúpinn, finnast engar sannanir þess að dularfull hvörf séu tíðari í Bermúda-þríhyrningnum en á öðrum stórum hafsvæðum þar sem flugumferð er mikil.
