Í veiðiferð árið 1979 var ráðist á leiðtoga valdamesta ríkis heims.
Fjölmiðlar kölluðu þetta óvenjulega atvik „árás morðóðu kanínunnar“ – og dýrafræðingur útskýrði hvers vegna kanínan gerði árás.
Jimmy Carter hafði dálæti á veiðum og þann 20. apríl 1979 var sitjandi Bandaríkjaforseti úti á litlum árabát þegar mýrarkanína kom syndandi í átt að honum á miklum hraða.
Með því að slá frá sér með annarri árinni tókst honum að halda kanínunni frá bátnum. Atvikið hefði aldrei spurst út ef lausmáll fréttafulltrúi hefði ekki lekið því í fjölmiðla.Bandarískir blaðamenn kölluðu atvikið „The killer rabbit attack“ – árás morðóðu kanínunnar.
Flótti kanínunnar komst í fréttirnar
Vorið 1979 var forseti Bandaríkjanna í fríi á æskuheimili sínu, jarðhnetubúgarði nálægt bænum Plains í Georgíu.
Á landareigninni var lítið stöðuvatn sem Carter hafði gaman af að veiða í einsamall. Hann var því einn í árabátnum þegar kanínan réðst til atlögu. Carter tókst að hræða kanínuna sem gafst upp á að klifra um borð í bátinn og synti í staðinn að landi. Þar hvarf hún í gróðrinum.
Forsetinn skemmti síðar starfsfólki sínu með frásögn af þessu fyndna atviki en það var ekki ætlunin að sagan yrði opinber. Blaðafulltrúi Carters, Jody Powell, sagði hins vegar blaðamanninum Brooks Jackson hjá AP fréttastofunni söguna.
Sagan var komin á flug og The Washington Post valdi að birta grein með fyrirsögninni „Kanína ræðst á forsetann“ en The New York Times skrifaði „Saga af Carter og morðóðu kanínunni“.
Samkvæmt Jody Powell hafði kanínan „hvæst ógnandi, sýnt tennurnar og þanið út nasirnar“.
Forsetinn vísaði sögunni á bug í The New York Times daginn eftir með svohljóðandi yfirlýsingu: „Þetta var bara ósköp venjuleg mýrarkanína frá Georgíu.“
Mýrarkanínan lifir villt í votlendi í suðurhluta Bandaríkjanna. Hún er næturdýr sem verndar yfirráðasvæði sitt og er óhrædd við átök.
Að sögn Carters hafði kanínan stokkið út í vatnið til að flýja frá rándýri. Í sömu grein studdi dýrafræðingurinn Vagn Flyger forsetann:
„Hún var líklega bara hrædd og í leit að þurrum stað til að fela sig á.“
