Flug- og skipaflutninga þarf að gera vistvænni og hindra losun koltvísýrings en lausnir hafa ekki verið á hverju strái. Vísindamenn við ETH í Zürich hyggjast breyta þessu með tækni sem umbreytir lofti og sólarorku í kolefnishlutlaust eldsneyti.
Í tvö ár hafa vísindamennirnir gert tilraunir á þaki háskólans. Þar hefur lítil tilraunastöð knúin sólarorku safnað koltvísýringi og vatni úr loftinu og umbreytt þessu tvennu í gas úr vetni og kolsýringi.
Diskurinn á þaki svissneska háskólans notar sólarorku til að breyta lofti í eldsneyti.
Úr þessu gasi hefur tilraunastöðin svo unnið bensín, metanól og önnur kolvetni sem unnt er að nota sem eldsneyti í flugvélar og skip.
Þegar eldsneytinu er brennt í afkastamiklum vélum myndast nákvæmlega jafnmikill koltvísýringur og upphaflega var unninn úr loftinu. Það er þetta sem skapar kolefnishlutleysið.
Hvernig virkar sólarofninn?
Sólarknúna smáhreinsunarstöðin sameinar þrjú varmaefnafræðileg umbreytingarferli:
- CO2 og vatn er dregið úr lofti.
- CO2 og vatn er hitað upp í 1500 °C og skipt í syngas.
- Syngasið er unnið í fljótandi kolvetni.
Niðurstöður rannsóknarinnar hafa nú verið birtar í vísindaritinu Nature og samkvæmt þeim er framleiðslan nógu stöðug við algengar veðuraðstæður til að unnt sé að framleiða eldsneytið í miklu magni.
Vísindamennirnir áætla að vinnsluver sem næði yfir um 1% af eyðimerkursvæðum jarðar dygði til að uppfylla heildarþörfina fyrir jarðefnalaust eldsneyti. Lítraverðið fyrir flugvélabensín unnið úr lofti og sólskini er áætlað um kringum 200 krónur.
