Með nýrri tækni sem örvar sjónstöðvar heilans geta blindir nú greint bókstafi og önnur einföld mynstur. Þetta er fyrsta skrefið í þá átt að beintengja upptökubúnað við sjónstöðvar heilans.
Tækninni má líkja við tilfinningaskyn okkar og það eru vísindamenn hjá Baylor-læknaháskólanum í BNA sem hafa þróað hana. Ef við finnum fyrir bókstafnum N í lófanum, greinum við ekki formið en ef það er í staðinn teiknað í lófann, skynjum við greinilega að þetta er N.
Blindir geta „séð“ bókstaf (t.v.) þegar rafóðurnar eru virkjaðar hver á fætur annarri, líkt og ef stafurinn væri teiknaður í lófann (t.h.).
Á sama hátt geta rafóður sem græddar eru á sjónstöðvar heilans, skapað form sem við þekkjum ef þær eru virkjaðar í ákveðinni röð.
Ástæðan er sú að yfirborð sjónstöðvanna er eins konar kort þar sem hver punktur samsvarar tilteknum punkti í sjónsviðinu.
Eins og að sjá lýsandi punkta
Vísindamennirnir prófuðu aðferðina á bæði blindu og sjáandi fólki sem fengið hafði ígræddar rafóður við sjónstöðvarnar í tengslum við meðferð gegn flogaveiki.
Rafóður á yfirborði sjónstöðvanna teikna einföld form sem sá blindi getur svo endurteiknað á snertiskjá.
Báðir hóparnir gátu afkóðað mynstrin sem rafóðurnar teiknuðu og teiknað þau síðan á snertiskjá. Fólkið lýsti tilfinningunni þannig að það sæi punkta sem mynduðu formið.
Enn takmarkast upplausn formanna af fjölda rafóða.
Á yfirborði sjónstöðvanna eru um hálfur milljarður taugafrumna og tilraunin örvaði ekki nema lítið brotabrot af þeim fjölda.
Vísindamennirnir álíta þess vegna að upplausnina megi bæta til muna með ígræðslum sem innihalda mörg þúsund örsmáar rafóður sem sitji þéttar.
