Þunglyndi er einn algengasti sálræni sjúkdómurinn á Íslandi. Talið er að sjötti hver Íslendingur þrói með sér þunglyndiseinkenni einhvern tímann á lífsleiðinni og um 12-18 þúsund Íslendingar þjáist af sjúklegu þunglyndi. Það eru þó til ráð.
Rannsókn sýnir nefnilega að þunglyndissjúklingar hressast til muna þegar rafstraum er hleypt á sérstakt svæði í heilanum.
Taugasérfræðingar hjá Kaliforníuháskóla í BNA uppgötvuðu þessi áhrif þegar þeir notuðu rafóður til að örva mismunandi heilastöðvar í 25 flogaveikisjúklingum.
Heilasvæði aftan við augun virðist ráða miklu um geðbrigði. Það kallast Lateral orbitofrontal cortex (græna svæðið á myndinni).
Rafóður léttu lundina
Fyrir rannsóknina voru sjúklingarnir látnir undirgangast ýtarlega athugun sem leiddi í ljós að sumir þeirra báru einkenni þunglyndis.
Vísindamönnunum gafst því einstætt tækifæri til að athuga möguleg geðbrigði þessara sjúklinga þegar rafóðurnar sendu straum gegnum mismunandi svæði heilans.
Þegar það heilasvæði sem kallast „Lateral orbitofrontal cortex“ var örvað með rafstraumi sögðust sjúklingar með miðlungsþunglyndi eða meira finna umtalsverðan létti.
Þetta heilasvæði tengist m.a. tilfinningum og þeirri ánægju sem fólk getur fundið til þegar það tekur ákvarðanir.
Um leið og hætt var að örva svæðið hvarf sá léttir sem sjúklingarnir fundu.
Sjúklingar án þunglyndiseinkenna fundu engan mun.
Lundarfar og geðbrigði tengjast ýmsum heilastöðvum en þessi nýja rannsókn leiðir í ljós að þetta svæði aftan við augun gegnir mikilsverðu hlutverki, en það kann að stafa af því að það hefur tengingar við margar aðrar heilastöðvar.
