Húðfrumur og pítsudeig hafa lengi verið notuð í þrívíddarprentun. Nú er röðin komin að bakteríum. Efnasérfræðingar hjá ETH tæknistofnuninni í Zürich hafa þróað lifandi prentefni, sem þeir nefna Flink.

Bakteríum og næringarefnum er blandað í vatnshlaup, sem notað er til að halda öllu saman.

Úr efninu má prenta hvaða þrívíddarlögun sem er og í hverri útprentun geta verið allt að fjórar bakteríutegundir og eiginleikarnir því afar mismundandi.

Í tilraun einni sýndu vísindamennirnir fram á tvenns konar möguleg not af efninu. Þeir prentuðu lítið net með bakteríum, sem geta brotið niður fenól, efni, sem m.a. er í eiturefnum sem ógnað geta ám og vötnum.

Það er reyndar þekkt aðferð að nota bakteríur til að brjóta niður fenól og fleiri mengandi efnasambönd, en því fylgja líka ákveðnir veikleikar. Það er erfitt að fylgjast með því hvar í vatninu bakteríurnar halda sig og bakteríurnar þurfa næringu, sem ekki er alltaf til staðar.

En með þessu nýja prentefni er hægt að setja endurnýtanlegt net í vatnið og bakteríurnar fá m.a.s. matarpakka með sér í vinnuna.

Vísindamennirnir prentuðu líka sérhæfðan plástur með bakteríum sem framleiða græðandi sellulósa. Í stað margra plástra, sem t.d. passa illa á olnboga eða höfuð, er nú hægt að prenta plástur í nákvæmlega réttu formi.