Hafir þú séð mynd Ridleys Scott, Alien, frá 1979, manstu kannski eftir þessum óhugnanlegu kvikindum sem stökkva upp á andlitið á geimförunum og klemma sig föst.
Sé svo, geturðu reynt að ímynda þér slíkar skepnur með 20 arma með litlum klóm á endanum – á mörg hundruð metra dýpi við Suðurskautslandið.
Slík dýr hafa ástralskir og bandarískir vísindamenn nú fundið við rannsóknir á mörgum tegundum sem veiddust í rannsóknarleiðöngrum á árunum 2008-2017.
Nýfundna tegundin hefur fengið fræðiheitið Promachocrinus fragarius en latneska orðið fragum merkir jarðarber. Í óvísindalegra samhengi er dýrið kallað Suðurskauts-jarðarberjafjaðurstjarna.
Eins og jarðarber
Það heiti stafar af því að þegar armarnir hafa verið skornir af þykir búkurinn minna á jarðarber. Á endum armanna eru litlar klær sem þessi stjarna notar til að halda sér fastri við botninn.
Þessi nýuppgötvaða tegund tilheyrir flokki svokallaðra seildýra (Crinoidea) ásamt t.d. krossfiskum, ígulkerjum, sæbjúgum og fleiri fjaðurstjörnutegundum.
Hún ætti að kremjast í spað vegna gríðarlegs þrýstings á 10.000 metra dýpi. En henni er bara nokk sama…því hún hefur skjöld í þarminum.
Vísindamennirnir hafa skrifað um jarðarberjafjaðurstjörnu suðurskautsins í tímaritið Invertebrate Systematics, þar sem þeir segja m.a. frá því að aðeins ein tegund af fjaðurstjörnu hafi verið þekkt fram að þessu á suðurskautinu: Promachocrinus kerguelensis.
Armarnir eru misjafnir og sumir fjaðurkenndir. Þeir geta orðið allt að 8 cm langir. Þeir geta líka verið allt frá purpurarauðum yfir í mjög dökkrauðan lit.
Þessi svonefnda jarðarberjafjaðurstjarna lifir á 20-2.000 metra dýpi og það þurfti DNA-greiningu til að ákvarða tegundina, enda eru Promachocrinus-tegundir talsvert fleiri.