Sporöskjulaga Brasilíuhnetan er eilítið frábrugðin öðrum hnetum.
Hún felur nefnilega í sér örlítið magn af geislavirka frumefninu radíum sem gerir það að verkum að geislavirkni hnetunnar nemur allt að 444 Bq/kg.
Þetta er þúsundfalt meira en við á um flestar aðrar fæðutegundir en þó langur vegur frá markgildi ESB sem nemur 600 Bq/kg.
Brasilíuhnetan er þó engan veginn eins geislavirk og margt annað á jörðinni.
Geislavirkni úranmálms nemur 25 milljón Bq/kg. Þetta gerir það að verkum að úran er 56.300 sinnum geislavirkara en Brasilíuhnetur.
Úran er eitt algengasta frumefnið í skorpu jarðar þar sem það kemur fyrir sem úranmálmur. Hægt er að auðga málminn þannig að hann feli í sér meira magn af geislavirkasta ísótópanum, úran-235 sem bæði er notaður í kjarnorkuverum og -sprengjum.
3 geislavirkar fæðutegundir
Brasilíuhnetan er ekki eina fæðutegundin sem inniheldur geislavirkt frumefni.
Geislavirkni er nefnilega að finna víðs vegar á hnettinum og þar með talið einnig í matvælum sem við neytum. Tilteknar fæðutegundir á borð við Brasilíuhnetur eru með hátt innihald af kalíum sem er frumefni með óstöðugum atómkjörnum.
Óstöðugu atómkjarnarnir umbreytast í annað efni þegar kjarninn sundrast. Ferlið er geislavirkt og fyrir bragðið geta matvæli með miklu magni af kalíum orðið geislavirkari en matvæli sem fela í sér minna magn af því.
Samkvæmt upplýsingum frá Alþjóðaheilbrigðisstofnuninni (WHO) eru þessar þrjár fæðutegundir geislavirkari en flestar aðrar:
Bananar
Guli bananinn er þekktur fyrir mikið magn af frumefninu kalíum en hann inniheldur 130 Bq/kg.
Gulrætur
Gulrætur fela í sér mikið af betakaróteni og C-vítamíni. Þessi gula rót felur einnig í sér um það bil 130 Bq/kg.
Rautt kjöt
Líkt og bananar og gulrætur felur rautt kjöt aðallega í sér kalíum en einnig agnarögn af radíum. Rautt kjöt inniheldur fyrir vikið rétt rúmlega 110 Bq/kg.
Orðskýring: Bekerel (Bq)
- Bekerel er mælieining fyrir geislavirkni sem segir til um magnið af geislavirkni í tilteknu efni, þ.e. hversu mikið af jónandi geislun efnið sendir frá sér. Eitt Bq er sú geislavirkni sem samsvarar einni kjarnabreytingu á hverri sekúndu.
