Það hljómar eins og eitthvað úr hryllingsmynd en til eru manneskjur með svört bein.
Hið undarlega fyrirbæri kemur fram hjá sjúklingum sem hafa verið meðhöndlaðir með lyfinu mínósýklíni. Lyfið er bæði bakteríudrepandi og bólgueyðandi og er því notað sem sýklalyf og gegn slitgigt, gelgjubólum og öðrum bólgusjúkdómum.
Mínósýklín er hins vegar ekki án aukaverkana og sjúklingar eiga á hættu á mislitun í vefjum og líffærum, þar með talið húð, varir og augu, sem og tennur og bein.
Litabreytingarnar geta verið svartar, grásvartar, gráar, blágrænar eða brúnleitar.
Þó að litabreytingar í húðinni geti gengið tilbaka eru þær varanlegar í beinum og tönnum. Vísindamenn áætla að yfir 20 prósent sjúklinga sem hafa tekið mínósýklín í meira en fjögur ár fái litabreytingar í munni eða beinum.
Vítamín hægir á mislitun
Flest tilfelli mislitaðra tanna uppgötvast hjá tannlækni en svörtu beinin koma oft fyrst fram í tengslum við aðgerð.
Dökkar litabreytingar á vefjum boðar venjulega ekkert gott en litabreyting frá mínósýklíni virðist ekki vera skaðleg. Ef læknir gefur þér mínósýklín gæti verið gott að taka inn C-vítamín til viðbótar en það dregur úr hættu á mislitun.
Gigtarlyf litar beinin svört
Niðurbrot lyfsins mínósýklíns, sem m.a. er notað gegn gigt og bólgum, getur valdið svörtum beinum.
1. Mínósýklín kemst í gegn
Lyfið mínósýklín (rautt) er einstaklega fituleysanlegt og kemst því auðveldlega inn í vefi og vökva líkamans. Þar binst það m.a. við hemóglóbín í blóði og kollagen í beinum.
2. Niðurbrot litar vef
Í beininu kemst mínósýklín í snertingu við súrefni og brotnar niður. Þetta leiðir til nokkurra svokallaðra kínínlíkra efna sem safnast fyrir í beinum og valda mislitun.
3. Mikilvægt vítamín verndar
Hægt er að ráða bót á myndun kínínlíkra efna í beinum með C-vítamíni. Vítamínið virkar sem andoxunarefni þannig að hægt er á oxun minósýklíns – og þar með litabreytingunni.
