Í Bandaríkjunum eru að alast upp 191.000 börn sem eiga samkynja foreldra. Vísindamenn hafa rannsakað hvernig börn þessi spjara sig í skóla og annars staðar.
Tæplega 3.000 börn sem áttu foreldra af sama kyni voru borin saman við börn sem áttu bæði föður og móður. Niðurstöðurnar leiddu í ljós að börn sem eiga samkynja foreldra spjöruðu sig betur í grunnskóla, auk þess sem þau voru fimm hundraðshlutum líklegri til að ljúka framhaldsskólanámi.
5 prósent líklegri til að ljúka framhaldsskólanámi. Þetta átti við um börn samkynhneigðra foreldra, samanborið við börn gagnkynhneigðra.
Ein skýringin er sú að samkynhneigðir foreldrar verji meiri tíma, orku og fjármunum í barn sitt því þeir hafi þurft að leggja harðar að sér á svo mörgum sviðum til að verða foreldrar.
Önnur skýring kann að vera sú að lesbísk pör velja oftar en ekki sæðisgjafa með jákvæða kosti, t.d. góða greind.
Konur verja jafnframt að öllu jöfnu meiri tíma með börnum sínum en við á um karla og aukin samvera hefur jákvæð áhrif á þroska barnanna með tilliti til samskipta við aðra. Börn lesbískra foreldra fá því samkvæmt kenningunni helmingi meiri kvenlega umönnun en við á um önnur börn.
Þá hafa rannsóknir enn fremur leitt í ljós að samkynhneigðir feður verja meiri tíma með börnum sínum en við á um gagnkynhneigða feður.
Margir vísindamenn eru þeirrar skoðunar að börn samkynhneigðra para spjari sig að minnsta kosti jafn vel félagslega og andlega og þau börn sem fæðast í hefðbundnum hjónaböndum. Þetta segja þeir gefa til kynna að jafnvægi í fjölskyldunni, svo og félags- og fjárhagsleg staða, skipti meira máli fyrir vellíðan barna en kyn foreldranna.
