Fyrsta SMS sögunnar var sent þann 3. desember 1992. Innihald skilaboðanna var stutt og laggott: „Merry Christmas“.
Sendandinn var 22 ára gamall forritari, Neil Papworth sem var að vinna að þróun þjónustu fyrir stutt skilaboð hjá breska símafyrirtækinu Vodafone – nefnt Short Message System (SMS).
Móttakandinn var forstjóri Vodafone, Richard Jarvis sem gat lesið SMS-skilaboðin á Orbitel 901 farsíma sínum sem vóg meira en tvö kíló.
SMS-ið veitti einkum ungu fólki kost á skjótum, auðveldum og ódýrum samskiptum sín á milli.
SMS-skilaboð voru fyrir yfirmenn
Strax ári seinna setti Nokia farsíma á markað sem gerði eigendum kleift að senda SMS sín á milli en vinsældir smáskilaboðanna sprungu út árið 1999. Það ár var hægt að senda skilaboðin milli símafyrirtækja og á skömmum tíma breiddust þau út eins og eldur um sinu.
Þremur árum síðar var búið að senda meira en 250 milljarða af skilaboðum vítt og breitt um heiminn og SMS hafði þróast í ódýrt og einfalt samskiptakerfi sem einkum ungir nýttu sér.
„Árið 1992 var það aðallega hugsað til að senda forstjórum á faraldsfæti skilaboð. Engan grunaði að SMS yrði svona ofboðslega vinsælt fyrirbæri“, sagði Neil Pepworth árið 2012.
