Jarðfræðingar eiga erfitt með að svara því hvaða eldstöð eigi skilið titilinn hættulegasta eldfjall heims.
Eldstöðvar eru almennt svo skelfilega ófyrirsjáanlegar að sofandi eldstöð gæti þess vegna sem best rumskað og valdið verstu hamförum í sögu mannkyns.
Eldfjall sem stöðugt gýs
Ef við viljum velja eldfjall sem hefur verið virkt tiltölulega nýlega, er kannski einfaldast að Sakurajima í Japan fái titilinn. Eldfjallið er á þéttbýlu svæði og þar hefur gosið meira eða minna samfellt allt frá árinu 1955.
Í fáeinna kílómetra fjarlægð er borgin Kagoshima, þar sem búa meira en 700.000 manns. Öflugt og óvænt gos gæti því auðveldlega banað tugum þúsunda.
Hraðfara gjóskustraumar
Annað eldfjall sem kæmi til greina er Merapi í Indónesíu. Þar varð öflugt gos árið 2010. Það kostaði 190 mannslíf og 370.000 íbúar voru fluttir í meira en 20 km fjarlægð frá fjallinu. Merapi er þekkt fyrir um 1.000 gráðu heita, hraðfara strauma gass og gjósku sem renna niður hlíðarnar á mörg hundruð kílómetra hraða.
Tifandi tímasprengja
Eldstöð þarf þó ekki að hafa gosið nýlega til að teljast hættuleg. Ofureldstöðin undir Yellowstone-þjóðgarðinum í Bandaríkjunum gaus síðast fyrir 640.000 árum en nú gæti farið að styttast í næsta gos því talið er að um 700.000 ár líði að meðaltali milli gosa. Verði eldgos þarna, ógnar það stórum hlutum Bandaríkjanna og verður öllu mannkyni þung þraut vegna öskuskýja sem dreifast og byrgja fyrir sólarljósið.
Banvænustu eldfjöllin
Það eldgos sem kostað hefur flest mannslíf varð í Tambora í Indónesíu 1815. Þá létust 92.000 manns.
1. Tambora, Indónesíu – 1815 – 92.000.
2. Krakatá, Indónesíu – 1883 – 36.000.
3. Peléefjall, Martinique – 1902 – 29.000.
4. Nevado del Ruiz, Kólombíu – 1985 – 25.000.
5. Unzen, Japan – 1792 – 14.000.
