Hin þrjátíu ára gamla japanska Aki Maita sat og horfði á sjónvarpsfrétt, þar sem lítill drengur kvartaði sáran undan því að hann gæti ekki tekið gæludýr sitt – litla skjaldböku – með í skólann. Nú sat hún í lítilli íbúð sinni og velti vöngum. Kannski gæti hún fundið upp gæludýr sem væri bæði hreinlegt og tæki ekki mikið pláss.
Ávöxtur þess var stafræna gæludýrið Tamagotchi sem mátti setja á lyklakippu. Árið 1995 hafði Aki Maita enn ekki hugmynd um að þessi nýja uppfinning átti eftir að verða eitthvert vinsælasta leikfang sögunnar og þegar upp var staðið höfðu selst meira en 80 milljón eintök á heimsvísu.
Aki Maita gaf heiminum tamagotchi – en jafnvel hún græddi ekki á sölu á vinsæla leikfanginu.
Uppfinningamaðurinn fékk ekkert
Maita starfaði hjá leikfangaverksmiðjunni Bandai og leitaði strax til eins af hönnuðum fyrirtækisins sem hjálpaði henni við að smíða frumgerð. Hún deildi út 200 stykkjum af þessum rafrænu gæludýrum til ungra stúlkna og greindi gaumgæfilega viðbrögð þeirra, meðal annars við formum og litum.
Tamagotchi var síðan sett í sölu árið 1996 og þetta nýja leikfang sló strax í gegn. Ekki leið á löngu áður en finna mátti stafræna gæludýrið í hillum verslana í meira en 30 löndum og sjá mátti þennan förunaut í bæði kvikmyndum og tölvuspilum.
Því miður fyrir Maita fékk hún ekki hlut í feiknarlegum ágóða fyrirtækisins, enda átti vinnuveitandinn öll réttindi varðandi leikfangið. Hún fékk hvorki stöðuhækkun, launahækkun eða bónus þrátt fyrir að uppfinning hennar hafði fært fyrirtækinu marga tugi milljarða króna.
