Árið 2007 er Bandaríkjamaðurinn John Galvan að horfa á sjónvarpið í fangaklefa sínum þar sem hann afplánar lífstíðardóm. Það er verið að endursýna eldri þátt seríunnar MythBusters í sjónvarpinu.
Í þættinum „Hollywood on Trial“ frá árinu 2005 reyna gestgjafarnir tveir Jamie Hyneman og Adam Savage að endurskapa röð frægra atriða úr Hollywood kvikmyndum.
Þeir prófa meðal annars hvort mögulegt sé að kveikja í bensínpolli með sígarettu. Eftir ótal tilraunir gefast þeir upp. Í einni tilrauninni bleyttu þeir t.a.m. í logandi sígarettu með bensíni en ekkert gekk.
Þetta mun verða leið Galvan út úr fangelsinu að mati samtakanna Innocence Project sem aðstoða Bandaríkjamenn sem sitja inni saklausir.
Adam Savage (til vinstri) og Jamie Hyneman stjórnuðu hinni frægu „MythBusters“ þáttaröð á Discovery sjónvarpsstöðinni á árunum 2003 til 2016.
Rangar sakagiftir
Í september 1986 létust tveir bræður í eldsvoða í fjölbýlishúsi í suðvesturhluta Chicago í Bandaríkjunum.
Systkini þeirra, Blanca og Jorge, björguðust á undraverðan hátt og létu lögreglunni vita að nágrannakona þeirra, hafi hótað að kveikja í byggingunni í hefndarskyni fyrir dauða bróður síns.
Konan taldi bróður sinn hafa verið myrtur af Latin Kings-klíkunni en Jorge var einmitt meðlimur þeirrar klíku. Í yfirheyrslum lögreglunnar neitaði konan að hafa vitað um íkveikjuna en benti þess í stað á John Galvan.
Aðrir nágrannar á svæðinu staðfestu frásögn hennar og Galvan var handtekinn ásamt tveimur öðrum. Meira að segja þrátt fyrir að Galvan hafi gist hjá ömmu sinni nóttina sem kveikt var í.
Hinn 18 ára gamli Galvan og félagar hans tveir voru færðir á lögreglustöðina til yfirheyrslu þar sem þeir voru, að eigin sögn, beittir líkamlegu ofbeldi og þvingaðir til að játa.
Á endanum skrifuðu allir þrír undir yfirlýsingu þar sem þeir játuðu verknaðinn. Þeir voru svo dæmdir í lífstíðarfangelsi fyrir morð að yfirlögðu ráði.
Í yfirlýsingunni viðurkenndu Galvan og hinir tveir að hafa kastað bensínsprengju inn um glugga blokkarinnar.
Galvan sagði í yfirlýsingu sinni að hann hafi kveikt í molotov-kokteilnum með sígarettu.
Þetta smáatriði mun síðar skipta sköpum.
Ekki eins og í hasarmynd
Þegar John Galvan sér MythBuster þáttinn 21 ári síðar hafði hann samband við lögfræðing sinn sem fór í að rannsaka málið.
Lögfræðingurinn komst að því að árið 2007 rannsakaði hópur vísindamanna bandarísku löggæslustofnuninni ATF ( America’s Bureau of Alcohol, Tobacco, Firearms and Explosives) einmitt þetta..
Vísindamennirnir reyndu í yfir 2000 skipti að kveikja í bensíni með sígarettu við mismunandi aðstæður – þar á meðal í lofttæmi, sem hækkaði hitastig sígarettunnar.
Jafnvel eftir að hafa hellt bensíni beint á sígarettuna urðu þeir að gefast upp og álykta að ekki væri hægt að kveikja í bensíni með sígarettu.
Rannsakendur töldu ástæðuna vera að bensínið hefur aðeins takmarkaða snertingu við heitasta hluta öskunnar í sígarettunni. Þeir könnuðu þetta m.a. með röntgenhitamyndavél sem getur staðbundið hita.
Lögmaður Galvan kallaði því til fjölda íkveikjusérfræðinga til að sannreyna enn frekar að ómögulegt væri að kveikja í bensíni með sígarettum.
Auk þess gátu nokkur vitni staðfest að lögreglumaðurinn sem yfirheyrði Galvan og hina tvo kvöldið sem þeir voru handteknir hafði áður þvingað fram játningar með ofbeldi.
Dómur Galvan og hinna tveggja var hnekkt og allir þrír eru í dag frjálsir ferða sinna.
