Þar til fyrir 200 milljón árum var nánast allt þurrlendi jarðar samankomið í ofurmeginlandinu Pangeu.
Nú sýna útreikningar tölvulíkans hjá Curtinháskóla hvernig jarðskorpuflekarnir munu færa sig á næstu 300 milljónum ára og meginlandsflekarnir að lokum sameinast með samruna Asíu og Ameríku og þar með loka Kyrrahafinu sem nú þekur um þriðjung hnattarins.
Ástralía tengir
Aðrir jarðfræðingar hafa áður sett fram kenninguna um Amasíu sem eina mögulegra framtíðarsviðsmynda, varðandi landrek á næstu hundruðum milljóna ára.
En að sögn þeirra vísindamanna sem standa að nýja tölvulíkaninu staðfesta útreikningarnir að Ástralía muni fyrst tengjast Asíu og síðan mynda landbrú yfir til Ameríku, þegar Kyrrahafið minnkar og hverfur svo að lokum.
Samkvæmt útreikningum jarðfræðilíkans lokast Kyrrahaf en Ameríku- og Asíuflekana rekur saman og þeir mynda ofurmeginlandið Amasíu á næstu 200-300 milljónum ára.
Þetta verður síður en svo í fyrsta sinn sem heimsálfurnar sameinast í eitt stórt meginland.
Á síðustu tveimur milljörðum ára hafa meginlandsflekarnir oftar en einu sinni safnast saman í svonefnd ofurmeginlönd.
Þetta gerist á nálægt 600 milljón ára fresti og þetta ferli kalla jarðfræðingar ofurmeginlandahringinn.
Það er einmitt þekkingin á reki meginlandsflekanna ásamt svonefndum fjórvíðum jarðdýnamískum líkönum sem áströlsku vísindamennirnir hafa notað til að skyggnast 200-300 milljón ár inn í framtíðina.
Þeir telja líka að breytingarnar muni hafa gríðarmikil áhrif á vistkerfin, sjávarstöðu, hitastig og umhverfi.
Árekstur fleka skapaði Pangeu
Árekstur jarðskorpuflekanna undir þurrlendi jarðar skapaði ofurmeginlandið Pangeu fyrir um 325 milljónum ára.
Fyrir 325 milljón árum: Meginlönd rekast saman
Næstum allt þurrlendi jarðar myndar tvö meginlönd, Evróameríku og Gondwana. Þessar plötur rekast saman og loka Paleó-Tetýshafinu.
Fyrir 235 milljón árum: Allt þurrlendi í Pangeu
Allt þurrlendi jarðar hefur nú sameinast í Pangeu – eftir grísku orðunum pan = allt og gaia = land. Úthafið Panthalassa þekur hnöttinn að öðru leyti.
Fyrir 140 milljón árum: Heimsálfur myndast
Meginlandsflekarnir skiljast að og taka að brjóta Pangeu sundur. Norður-Atlantshaf er mjótt sund en Suður-Ameríka og Afríka fylgjast enn að.
