Í Atlantshafinu var krökkt af þýskum kafbátum þegar Franklin D. Roosevelt Bandaríkjaforseti, hugðist hitta breska forsætisráðherrann, Winston Churchill, í janúar árið 1943 í Casablanca í Norður-Afríku.
Fyrir bragðið valdi Roosevelt, fyrstur allra Bandaríkjaforseta, að ferðast með flugi yfir Atlantshafið.
Sjóflugvélin Boeing 314 Dixie Clipper frá flugfélaginu Pan Am tók á loft 11. janúar 1943 frá Miami í Flórída með flugstjórann Howard Cone við stjórnvölinn.
Sjóflugvél þessi var fyrsta og stærsta farþegaflugvél heims, ætluð fyrir langar vegalengdir og vélinni til fylgdar voru 35 orrustuflugvélar.
Þegar vélin hafði náð flughæð var borinn fram morgunverður fyrir forsetann og að honum loknum hafði forsetinn fataskipti, fór úr jakkafötunum í þægilegri ferðaföt sem samanstóðu af síðbuxum og peysu.
Áhöfnin í fyrstu forsetaflugvélinni hafði séð til þess að hafa til reiðu afmælistertu fyrir Franklin D. Roosevelt sem fagnaði 61 árs afmæli sínu á leið heim frá ráðstefnunni í Afríku.
Eftir millilendingu í Port of Spain á Trinidad tók vélin stefnuna á Belém í norðurhluta Brasilíu. Á þessum hluta leiðarinnar drap Roosevelt tímann með því að leggja kapal og dást að víðfeðmum regnskóginum sem vélin flaug yfir.
Eftir millilendinguna í Belém hófst þriðji og hættulegasti spölur ferðarinnar, flugferðin yfir Atlantshafið og aragrúa af kafbátum, áleiðis til Bathurst í Gambíu í Vestur-Afríku.
Forsetinn svaf bróðurpart 19 tíma langrar flugferðarinnar yfir hafið, í hjónarúmi sem komið hafði verið fyrir í flugvélinni af þessu sama tilefni, til þess að hann gæti mætt vel úthvíldur á ráðstefnuna.
Vélin komst heilu og höldnu til Bathurst, þar sem forsetinn og fylgdarlið hans skiptu yfir í vöruflutningavél sem flaug með hópinn síðasta spölinn til Casablanca.
LESTU EINNIG
Að ráðstefnunni lokinni flaug Roosevelt sömu leið aftur til Bandaríkjanna þar sem hann lenti 31. janúar. Daginn áður hafði hann fagnað afmæli sínu uppi í háloftunum.
Með þessari löngu flugferð innleiddi Roosevelt tímabil hinna fljúgandi forseta.
Sjóflugvélin var þó engan veginn útbúin með slíkar ferðir í huga en arftaki hennar, Douglas VC-54C, herflugvél sem gekk undir gælunafninu „Sacred Cow“ (Heilaga kýr), var hins vegar innréttuð með forsetaíbúð, ráðstefnuherbergi og samskiptamiðstöð.
Roosevelt flaug raunar aðeins einu sinni með nýju vélinni áður en hann lést en þetta var þegar hann flaug til Sovétríkjanna til að taka þátt í Jalta-ráðstefnunni í febrúar árið 1945.
Síðan tók eftirmaður hans, Harry S. Truman, við „Sacred Cow“ sem í raun réttri var fyrsta raunverulega forsetaflugvél heims.
Heitið Air Force One var hins vegar ekki notað um vélina fyrr en árið 1962, í tíð Kennedys.
