Óhugnanlegt atferli: Svartþrestir éta aðra fugla sömu tegundar
- Tegund: svartþröstur (Turdus merula)
- Vænghaf: 34-38 sm.
Svartþrestir hafa iðulega sést leggja sér til munns aðra fugla sömu tegundar, m.a. unga og keppinauta þeirra. Þó er álitið að atferli þetta sé fremur sjaldgæft en þess verður oft vart í kjölfar þurrka þegar helsta fæða fuglanna, ánamaðkar, er ekki í boði.
Raðmorðinginn: Flotmeisur vilja helst heila
- Tegund: Flotmeisa (Parus major)
- Vænghaf: 22-25 sm.
Flotmeisur ráðast stundum á og drepa aðra fugla og leðurblökur. Þær nota sterklegan gogginn til að höggva gat á höfuðkúpu andstæðingsins og éta síðan gjarnan úr honum heilann. Flotmeisur hafa einnig sést næra sig á líkum manna.
Myndskeið: Sjáðu flotmeisu drepa annan fugl (ekki fyrir viðkvæma):
Óþokkagengi: Gráspörvar ráðast til atlögu í hópum
- Tegund: Gráspör (Passer domesticus)
- Vænghaf: 21-25 sm.
Franskir vísindamenn fylgdust með fjórum gráspörvum deyða fugl sömu tegundar árið 2013. Gerendurnir fjórir, þrír karlfuglar og einn kvenfugl, réðust á fórnarlambið til skiptis þar til það að lokum gaf upp öndina. Svipað atferli hafði sést áður og stafar sennilega af fæðuskorti.
Ofbeldisbrjálæðingurinn: Glóbrystingurinn ræðst á allt og alla
- Tegund: Glóbrystingur (Erithacus rubecula)
- Vænghaf: 20-22 sm.
Glóbrystingar halda sig að miklu leyti innan sama svæðis og ráðast iðulega á aðra fugla sömu tegundar, svo og aðrar tegundir, uppstoppaða fugla eða jafnvel eigin spegilmynd. Árásirnar geta orðið einkar heiftúðlegar og enda stundum með dauða annars fuglsins.
Kynferðislega afbrigðilegur: Krákur hafa samfarir við lík
- Tegund: Kráka (Corvus)
- Vænghaf: 93-104 sm.
Í tilraun einni sem gerð var á amerískum krákum árið 2018 kom í ljós að þessir fuglar sem sagðir eru vera svo greindir, hafa stundum samfarir við dauða fugla sömu tegundar. Í einu tilviki eðlaði einkvænt fuglapar sig með dauðum fugli og reif hann síðan í sig.
Fanturinn: Skjóir veitast að rándýrum
- Tegund: Skjór (Pica pica)
- Vænghaf: 52-60 sm.
Skjórinn kærir sig ekki um rándýr og fuglarnir hópast oft saman og ráðast fyrirvaralaust á hunda, ketti, ránfugla eða slöngur. Markmiðið er þá að hræða óvininn í burtu til þess að afkvæmum skjósins standi ekki ógn af.
Nauðgarar: Endur nauðga í hópum
- Tegund: Stokkönd (Anas platyrhynchos)
- Vænghaf: 81-98 sm.
Hrottafengnar hópnauðganir eru mjög algengar meðal margra andartegunda. Vegna þessara harkalegu aðfara hafa kvenfuglarnir þróað með sér getuna til að loka á getnaðarlimi karlfuglanna til þess að körlunum takist ekki að sæða þær.
LESTU EINNIG
